๑. โกลิตสูตร

๑๐. ภิกฺขุสํยุตฺต

๑. โกลิตสุตฺตวณฺณนา

ภิกฺขุสํยุตฺตสฺส ปฐเม อาวุโสติ สาวกานํ อาลาโป. พุทฺธา หิ ภควนฺโต สาวเก อาลปนฺตา "ภิกฺขเว"ติ อาลปนฺติ, สาวกา ปน "พุทฺเธหิ สทิสา มา โหมา"ติ "อาวุโส"ติ ปฐมํ วตฺวา ปจฺฉา "ภิกฺขเว"ติ ภณนฺติ. พุทฺเธหิ จ อาลปิเต ภิกฺขุสํโฆ "ภนฺเต"ติ ปฏิวจนํ เทติ, สาวเกหิ "อาวุโส"ติ.

อยํ วุจฺจตีติ ยสฺมา ทุติยชฺฌาเน วิตกฺกวิจารา นิรุชฺฌนฺติ, เยสํ นิโรธา สทฺทายตนํ อปฺปวตฺตึ คจฺฉติ, ตสฺมา ยเทตํ ทุติยชฺฌานํ นาม, อยํ วุจฺจติ "อริยานํ ตุณฺหีภาโว"ติ อยเมตฺถ โยชนา. "ธมฺมี วา กถา อริโย วา ตุณฺหีภาโว"ติ เอตฺถ ปน กมฺมฏฺฐานมนสิกาโรปิ ปฐมชฺฌานาทีนิปิ อริโย ตุณฺหีภาโวเตฺวว สงฺขฺยํ คตานิ.

วิตกฺกสหคตาติ วิตกฺการมฺมณา. สญฺญามนสิการาติ สญฺญา จ มนสิกาโร จ. สมุทาจรนฺตีติ ปวตฺตนฺติ. เถรสฺส กิร ทุติยชฺฌานํ น ปคุณํ. อถสฺส ตโต วุฏฺฐิตสฺส วิตกฺกวิจารา น สนฺตโต อุปฏฺฐหึสุ. อิจฺจสฺส ทุติยชฺฌานมฺปิ สญฺญามนสิการาปิ หานภาคิยาว อเหสุํ, ตํ ทสฺเสนฺโต เอวมาห. สณฺฐุเปหีติ สมฺมา ฐเปหิ. เอโกทิภาวํ กโรหีติ เอกคฺคํ กโรหิ. สมาทหาติ สมฺมา อาทห อาโรเปหิ. มหาภิญฺญตนฺติ ฉฬภิญฺญตํ. สตฺถา กิร อิมินา อุปาเยน สตฺต ทิวเส เถรสฺส หานภาคิยํ สมาธึ วฑฺเฒตฺวา เถรํ ฉฬภิญฺญตํ ปาเปสิ. ปฐมํ.