๑. ธาตุสูตร

[๓๓๓] สาวตฺถิยํ วิหรติ ... ธาตุนานตฺตํ โว ภิกฺขเว เทสิสฺสามิ ตํ สุณาถ สาธุกํ มนสิกโรถ ภาสิสฺสามีติ ฯ เอวํ ภนฺเตติ โข เต ภิกฺขู ภควโต ปจฺจสฺโสสุํ ฯ

[๓๓๔] ภควา เอตทโวจ กตมญฺจ ภิกฺขเว ธาตุนานตฺตํ จกฺขุธาตุ รูปธาตุ จกฺขุวิญฺญาณธาตุ โสตธาตุ สทฺทธาตุ โสตวิญฺญาณธาตุ ฆานธาตุ คนฺธธาตุ ฆานวิญฺญาณธาตุ ชิวฺหาธาตุ รสธาตุ ชิวฺหาวิญฺญาณธาตุ กายธาตุ โผฏฺฐพฺพธาตุ กายวิญฺญาณธาตุ มโนธาตุ ธมฺมธาตุ มโนวิญฺญาณธาตุ อิทํ วุจฺจติ ภิกฺขเว ธาตุนานตฺตนฺติ ฯ ปฐมํ ฯ