๑๑. อตีตานาคตปัจจุปันนสูตร ที่ ๓

TIPITAKA Volume 17 : PALI ROMAN Sutta Pitaka Vol 9 : Sutta. Saṃ. Kha.

[38] Sāvatthiyaṃ . tatra kho .pe. rūpaṃ bhikkhave anattā atītānāgataṃ ko pana vādo paccuppannassa . evaṃ passaṃ bhikkhave sutavā ariyasāvako atītasmiṃ rūpasmiṃ anapekkho hoti anāgataṃ rūpaṃ nābhinandati paccuppannassa rūpassa nibbidāya virāgāya nirodhāya paṭipanno hoti . vedanā anattā . saññā anattā . Saṅkhārā anattā . viññāṇaṃ anattā atītānāgataṃ ko pana vādo paccuppannassa . evaṃ passaṃ bhikkhave sutavā ariyasāvako atītasmiṃ viññāṇasmiṃ anapekkho hoti anāgataṃ viññāṇaṃ nābhinandati paccuppannassa viññāṇassa nibbidāya virāgāya nirodhāya paṭipanno hotīti. Nakulapitavaggo paṭhamo. Tassuddānaṃ nakulapitā devadahā dvepi haliddikāni ca samādhi paṭisallānaṃ 1- upādānaparitassanā 2- duve atītānāgatapaccuppannā vaggo tena pavuccati. --------- @Footnote: 1 Ma. Yu. paṭisallānā . 2 Po. Ma. upādāparitassanā.