๑๘. เนวโหตินนโหติตถาคตสูตร

สาวตฺถี ฯ กิสฺมึ นุ โข ภิกฺขเว สติ กึ อุปาทาย กึ อภินิวิสฺส เอวํ ทิฏฺฐิ อุปฺปชฺชติ เนว โหติ น น โหติ ตถาคโต ปรมฺมรณาติ ฯ ภควํมูลกา โน ภนฺเต ธมฺมา ฯเปฯ รูเป โข ภิกฺขเว สติ รูปํ อุปาทาย รูปํ อภินิวิสฺส เอวํ ทิฏฺฐิ อุปฺปชฺชติ เนว โหติ น น โหติ ตถาคโต ปรมฺมรณาติ ฯเปฯ

ตํ กึ มญฺญถ ภิกฺขเว รูปํ นิจฺจํ วา อนิจฺจํ วาติ ฯ อนิจฺจํ ภนฺเต ฯเปฯ วิปริณามธมฺมํ อปิ นุ ตํ อนุปาทาย เอวํ ทิฏฺฐิ อุปฺปชฺเชยฺย เนว โหติ น น โหติ ตถาคโต ปรมฺมรณาติ ฯ โน เหตํ ภนฺเต ฯ ยมฺปิทํ ทิฏฺฐํ สุตํ มุตํ วิญฺญาตํ ปตฺตํ ปริเยสิตํ อนุวิจริตํ มนสา ตํปิ นิจฺจํ วา อนิจฺจํ วาติ ฯ อนิจฺจํ ภนฺเต ฯ ยํ ปนานิจฺจํ ทุกฺขํ วา ตํ สุขํ วาติ ฯ ทุกฺขํ ภนฺเต ฯ ยํ ปนานิจฺจํ ทุกฺขํ วิปริณามธมฺมํ อปิ นุ ตํ อนุปาทาย เอวํ ทิฏฺฐิ อุปฺปชฺเชยฺย เนว โหติ น น โหติ ตถาคโต ปรมฺมรณาติ ฯ โน เหตํ ภนฺเต ฯ ยโต จ โข ภิกฺขเว อริยสาวกสฺส อิเมสุ ฉสุ ฐาเนสุ กงฺขา ปหีนา โหติ ทุกฺเขปิสฺส กงฺขา ปหีนา โหติ ทุกฺขสมุทเยปิสฺส กงฺขา ปหีนา โหติ ฯเปฯ นิยโต สมฺโพธิปรายโนติ ฯ โสตาปตฺติวคฺโค ฯ อฏฺฐารสเวยฺยากรณํ นิฏฺฐิตํ _______________ #ม. ยุ. ตสฺสุทฺทานํ # วาตํ เอตํ มม โส อตฺตา โน จ เม สิยา # นตฺถิ กโรโต เหตุ จ มหาทิฏฺเฐน อฏฺฐมํ # สสฺสโต โลโก จ อสสฺสโต จ อนฺตวา จ # อนนฺตวา จ ตํ ชีวํ ตํ สริรนฺติ อญฺญํ ชีวํ อญฺญํ สริรนฺติ จ # โหติ ตถาคโต ปรํมรณาติ น โหติ ตถาคโต ปรํมรณาติ # เนว โหติ น น โหติ ตถาคโต ปรํมรณาติ ฯ ทิฏฺฐิสํยุตฺเต ทุติยเปยฺยาโล ทุติโย ๑