๑. สมาธิสมาปัตติสูตร

Sāvatthī . tatra kho .pe. cattārome bhikkhave jhāyī . katame cattāro . idha bhikkhave ekacco jhāyī samādhismiṃ samādhikusalo hoti na samādhismiṃ samāpattikusalo . idha pana bhikkhave ekacco jhāyī samādhismiṃ samāpattikusalo hoti na samādhismiṃ samādhikusalo . idha pana bhikkhave ekacco jhāyī neva samādhismiṃ samādhikusalo hoti na samādhismiṃ samāpattikusalo . idha pana bhikkhave ekacco jhāyī samādhismiṃ samādhikusalo ca hoti samādhismiṃ samāpattikusalo ca . tatra bhikkhave yvāyaṃ jhāyī samādhismiṃ samādhikusalo ca [2]- samādhismiṃ samāpattikusalo ca. Ayaṃ imesaṃ catunnaṃ jhāyīnaṃ aggo ca seṭṭho ca pāmokkho 3- ca uttamo ca pavaro ca. Seyyathāpi bhikkhave gavā khīraṃ khīramhā dadhi dadhimhā navanītaṃ navanītamhā sappi sappimhā sappimaṇḍo tatra aggamakkhāyati evameva kho bhikkhave yvāyaṃ jhāyī samādhismiṃ samādhikusalo ca samādhismiṃ samāpattikusalo ca . ayaṃ imesaṃ catunnaṃ jhāyīnaṃ aggo ca seṭṭho ca pāmokkho 4- ca uttamo ca pavaro cāti.