sevato bhajato payirupāsato, pañca suttante paccavekkhato

imehi paṇṇarasahi ākārehi imāni pañcindriyāni visujjhantī"ti.

Aparepi paṇṇarasa dhammā vimuttiparipācaniyā:- saddhāpañcamāni indriyāni, aniccasaññā, anicce dukkhasaññā, dukkhe anattasaññā, pahānasaññā, virāgasaññāti imā pañca nibbedhabhāgiyā saññā, meghiyattherassa kathitā kalyāṇamittatādayo pañca dhammāti. Kāya pana velāya bhagavato etadahosi? paccūsasamaye lokaṃ volokentassa.

Anekāni devatāsahassānīti āyasmatā rāhulena padumuttarassa bhagavato pādamūle pālitanāgarājakāle patthanaṃ paṭṭhapentena saddhiṃ patathanaṃ paṭṭhapitadevatāsu pana kāci bhummaṭṭhakā devatā, kāci antalikkhaṭṭhakā, kāci cātummahārājikā, kāci devaloke, kāci brahmaloke nibbattā. Imasmiṃ pana divase sabbāpi tā ekaṭṭhāne andhavanasmiṃyeva sannipatitā, tā sandhāyāha "anekāni devatāsahassānī"ti. Dhammacakkhunti imasmiṃ sutte cattāro ca maggā cattāri ca phalāni dhammacakkhūti veditabbāni. Tattha hi kāci devatā sotāpannā ahesuṃ, kāci sakadāgāmī, anāgāmī, khīṇāsavā. Tāsaṃ ca pana devatānaṃ ettakāti gaṇanavasena paricchedo natthi. Sesaṃ sabbattha uttānameva.