๒. อิสิทัตตสูตร ที่ ๑

2. Paṭhamaisidattasuttavaṇṇanā

Dutiye āyasmantaṃ theranti tesu theresu jeṭṭhakaṃ mahātheraṃ. Tuṇhī ahosīti jānantopi avisāradattā na kiñci byāhari. Byākaromahaṃ bhanteti "ayaṃ thero neva attanā byākaroti, na aññe ajjhesati, upāsako ca bhikkhusaṃghaṃ viheseti, ahametaṃ byākaritvā phāsuvihāraṃ katvā dassāmī"ti cintetvā āsanato vuṭṭhāya therassa santikaṃ gantvā evaṃ okāsamakāsi, katāvakāso pana attano āsane nisīditvā byākāsi.

Sahatthāti sahatthena. Santappesīti yāva dicchakaṃ dadanto 1- suṭṭhu tappesi. Sampavāresīti "alaṃ alan"ti hatthasaññāya ceva vācāya ca paṭikkhipāpesi. Onītapattapāṇinoti pāṇito apanītapattā dhovitvā thavikāya osāpetvā aṃse laggitapattāti attho.

@Footnote: 1 cha.Ma. dento