๙. กุลสูตร

Ekaṃ samayaṃ bhagavā kosalesu cārikaṃ caramāno mahatā bhikkhusaṅghena saddhiṃ yena nāḷandā tadavasari . tatra sudaṃ bhagavā nāḷandāyaṃ viharati pāvārikambavane . tena kho pana samayena nāḷandā dubbhikkhā hoti dvīhitikā setaṭṭhikā salākāvuttā . Tena kho pana samayena nigaṇṭho nāṭaputto nāḷandāyaṃ paṭivasati mahatiyā nigaṇṭhaparisāya saddhiṃ . atha kho asibandhakaputto gāmaṇī nigaṇṭhasāvako yena nigaṇṭho nāṭaputto tenupasaṅkami upasaṅkamitvā nigaṇṭhaṃ nāṭaputtaṃ abhivādetvā ekamattaṃ nisīdi. {620.1} Ekamantaṃ nisinnaṃ kho asibandhakaputtaṃ gāmaṇiṃ nigaṇṭho nāṭaputto etadavoca ehi tvaṃ gāmaṇi samaṇassa gotamassa vādaṃ āropehi evaṃ te kalyāṇo kittisaddo abbhuggacchissati asibandhakaputtena gāmaṇinā samaṇassa gotamassa evaṃmahiddhikassa evaṃmahānubhāvassa vādo āropitoti . kathaṃ panāhaṃ bhante samaṇassa gotamassa evaṃmahiddhikassa evaṃmahānubhāvassa vādaṃ āropemīti 1- . Ehi tvaṃ gāmaṇi yena samaṇo gotamo tenupasaṅkama upasaṅkamitvā samaṇaṃ gotamaṃ evaṃ vadehi nanu bhante bhagavā anekapariyāyena @Footnote: 1 Ma. Yu. āropessāmīti. Kulānaṃ anudayaṃ vaṇṇeti anurakkhaṃ vaṇṇeti anukampaṃ vaṇṇetīti . Sace te 1- gāmaṇi samaṇo gotamo evaṃ puṭṭho evaṃ byākaroti evaṃ gāmaṇi tathāgato anekapariyāyena kulānaṃ anudayaṃ vaṇṇeti anurakkhaṃ vaṇṇeti anukampaṃ vaṇṇetīti . tamenaṃ tvaṃ evaṃ vadeyyāsi atha kiñcarahi bhante bhagavā nāḷande dubbhikkhe dvīhitike setaṭṭhike salākāvutte mahatā bhikkhusaṅghena saddhiṃ cārikañcarati ucchedāya bhagavā kulānaṃ paṭipanno anayāya bhagavā kulānaṃ paṭipanno upaghātāya bhagavā kulānaṃ paṭipannoti . imaṃ kho te gāmaṇi samaṇo gotamo ubhatokoṭikaṃ pañhaṃ puṭṭho neva sakkhati uggilituṃ neva sakkhati ogilitunti.

Evaṃ bhanteti kho asibandhakaputto gāmaṇī nigaṇṭhassa nāṭaputtassa paṭissutvā uṭṭhāyāsanā nigaṇṭhaṃ nāṭaputtaṃ abhivādetvā padakkhiṇaṃ katvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho asibandhakaputto gāmaṇī bhagavantaṃ etadavoca nanu bhante bhagavā anekapariyāyena kulānaṃ anudayaṃ vaṇṇeti anurakkhaṃ vaṇṇeti anukampaṃ vaṇṇetīti . evaṃ gāmaṇi tathāgato anekapariyāyena kulānaṃ anudayaṃ vaṇṇeti anurakkhaṃ vaṇṇeti anukampaṃ vaṇṇetīti . Atha kiñcarahi bhante bhagavā nāḷande dubbhikkhe dvīhitike setaṭṭhike salākāvutte mahatā bhikkhusaṅghena saddhiṃ @Footnote: 1 Ma. Yu. kho. Cārikaṃ carati ucchedāya bhagavā kulānaṃ paṭipanno anayāya bhagavā kulānaṃ paṭipanno upaghātāya bhagavā kulānaṃ paṭipannoti.

Ito so gāmaṇi ekanavuto kappo yamahaṃ anussarāmi nābhijānāmi kiñci kulaṃ pakkabhikkhādānena upahatapubbaṃ . atha kho yāni tāni kulāni addhāni mahaddhanāni mahābhogāni pahūtajātarūparajatāni pahūtavittūpakaraṇāni pahūtadhanadhaññāni sabbāni tāni dānasambhūtāni ceva saccasambhūtāni ca saññamasambhūtāni ca 1- . Aṭṭha gāmaṇi hetū aṭṭha paccayā kulānaṃ upaghātāya rājato vā kulāni upaghātaṃ gacchanti corato vā kulāni upaghātaṃ gacchanti aggito vā kulāni upaghātaṃ gacchanti udakato vā kulāni upaghātaṃ gacchanti nihitaṃ vā ṭhānā 2- vigacchati 3- duppayuttā vā kammantā vipajjanti 4- kule vā kulaṅgāroti upapajjati yo te bhoge vikirati vidhamati viddhaṃseti aniccatāyeva aṭṭhamīti. {622.1} Ime kho gāmaṇi aṭṭha hetū aṭṭha paccayā kulānaṃ upaghātāya . imesu kho gāmaṇi aṭṭhasu hetūsu aṭṭhasu paccayesu saṃvijjamānesu yo maṃ evaṃ vadeyya ucchedāya bhagavā kulānaṃ paṭipanno anayāya bhagavā kulānaṃ paṭipanno upaghātāya bhagavā kulānaṃ paṭipannoti . taṃ gāmaṇi vācaṃ appahāya taṃ cittaṃ appahāya taṃ diṭṭhiṃ appaṭinissajjitvā yathābhataṃ nikkhitto evaṃ nirayeti . @Footnote: 1 Ma. sāmaññasaṃbhūtāni ca . 2 Sī. Yu. ayaṃ pāṭho natthi . 3 Sī. Yu. nādhigacchanti. @ 4 Yu. kammantaṃ jahanti. Evaṃ vutte asibandhakaputto gāmaṇī bhagavantaṃ etadavoca abhikkantaṃ bhante abhikkantaṃ bhante .pe. upāsakaṃ maṃ bhagavā dhāretu ajjatagge pāṇupetaṃ saraṇaṅgatanti. Navamaṃ.