วรรคที่ ๑

Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi bhikkhavoti . bhadanteti te bhikkhū bhagavato paccassosuṃ . bhagavā etadavoca asaṅkhatañca vo bhikkhave desissāmi asaṅkhatagāmiñca maggaṃ taṃ suṇātha . katamañca bhikkhave asaṅkhataṃ . yo bhikkhave rāgakkhayo dosakkhayo mohakkhayo . idaṃ vuccati bhikkhave asaṅkhataṃ . Katamo ca bhikkhave asaṅkhatagāmimaggo . kāyagatāsati . ayaṃ vuccati bhikkhave asaṅkhatagāmimaggo . iti kho bhikkhave desitaṃ vo mayā asaṅkhataṃ desito asaṅkhatagāmimaggo . yaṃ bhikkhave satthārā karaṇīyaṃ sāvakānaṃ hitesinā anukampakena anukampaṃ upādāya kataṃ vo taṃ mayā . etāni bhikkhave rukkhamūlāni etāni suññāgārāni. Jhāyatha bhikkhave mā pamādattha mā pacchā vippaṭisārino ahuvattha. Ayaṃ vo amhākaṃ anusāsanīti.

Asaṅkhatañca vo bhikkhave desissāmi asaṅkhatagāmiñca maggaṃ taṃ suṇātha . katamañca bhikkhave asaṅkhataṃ . yo bhikkhave rāgakkhayo dosakkhayo mohakkhayo . idaṃ vuccati bhikkhave asaṅkhataṃ . Katamo ca bhikkhave asaṅkhatagāmimaggo . samatho ca vipassanā ca . Ayaṃ vuccati bhikkhave asaṅkhatagāmimaggo .pe.

Katamo ca bhikkhave asaṅkhatagāmimaggo . Savitakkasavicāro samādhi avitakkavicāramatto samādhi avitakkaavicāro samādhi . Ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo . suññato samādhi animitto samādhi appaṇihito samādhi . ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo . cattāro satipaṭṭhānā. Ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo . cattāro sammappadhānā. Ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo . cattāro iddhipādā. Ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo . Pañcindriyāni. Ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo . pañca balāni. Ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo. Satta bojjhaṅgā. Ayaṃ vuccati bhikkhave asaṅkhatagāmimaggo.

Katamo ca bhikkhave asaṅkhatagāmimaggo. Ariyo aṭṭhaṅgiko maggo . ayaṃ vuccati bhikkhave asaṅkhatagāmimaggo . iti kho Bhikkhave desitaṃ vo mayā asaṅkhataṃ desito asaṅkhatagāmimaggo . Yaṃ bhikkhave satthārā karaṇīyaṃ sāvakānaṃ hitesinā anukampakena anukampaṃ upādāya kataṃ vo taṃ mayā . etāni bhikkhave rukkhamūlāni etāni suññāgārāni . jhāyatha bhikkhave mā pamādattha mā pacchā vippaṭisārino ahuvattha. Ayaṃ vo amhākaṃ anusāsanīti. Nibbānasaṃyuttassa 1- paṭhamo vaggo. Tassuddānaṃ kāyo samatho vitakko suññatā 2- satipaṭṭhānā sammappadhānā iddhipādā indriyā balabojjhaṅgā maggena ekādasamaṃ dasuddānaṃ 3- pavuccati. --------- @Footnote: 1 Ma. asaṅkhatasaṃyuttassa. 2 Ma. Yu. suññato . 3 Ma. tassuddānaṃ.