เสขสูตร

Evamme sutaṃ ekaṃ samayaṃ bhagavā kosambiyaṃ viharati ghositārāme . tatra kho bhagavā bhikkhū āmantesi atthi nu kho bhikkhave pariyāyo yaṃ pariyāyaṃ āgamma sekkho bhikkhu sekkhabhūmiyaṃ saṇṭhito 1- sekkhosmīti pajāneyya asekkho bhikkhu asekkhabhūmiyaṃ saṇṭhito asekkhosmīti pajāneyyāti . bhagavaṃmūlakā no bhante dhammā .pe.

Atthi bhikkhave pariyāyo yaṃ pariyāyaṃ āgamma sekkho bhikkhu sekkhabhūmiyaṃ saṇṭhito sekkhosmīti pajāneyya asekkho bhikkhu asekkhabhūmiyaṃ saṇṭhito asekkhosmīti pajāneyya.

Katamo ca bhikkhave pariyāyo yaṃ pariyāyaṃ āgamma sekkho bhikkhu sekkhabhūmiyaṃ saṇṭhito sekkhosmīti pajānāti . idha bhikkhave sekkho bhikkhu idaṃ dukkhanti yathābhūtaṃ pajānāti ayaṃ dukkhasamudayoti yathābhūtaṃ pajānāti ayaṃ dukkhanirodhoti yathābhūtaṃ pajānāti ayaṃ dukkhanirodhagāminī paṭipadāti yathābhūtaṃ pajānāti . Ayaṃpi kho bhikkhave pariyāyo yaṃ pariyāyaṃ āgamma sekkho bhikkhu sekkhabhūmiyaṃ saṇṭhito sekkhosmīti pajānāti.

Puna caparaṃ bhikkhave sekkho bhikkhu iti paṭisañcikkhati atthi nu kho ito bahiddhā añño samaṇo vā brāhmaṇo vā yo evaṃ bhūtaṃ tacchaṃ tathaṃ dhammaṃ deseti yathā bhagavāti . So evaṃ pajānāti natthi nu kho ito bahiddhā añño samaṇo @Footnote: 1 Ma. Yu. ṭhito. evamupari. Vā brāhmaṇo vā yo evaṃ bhūtaṃ tacchaṃ tathaṃ dhammaṃ deseti yathā bhagavāti . ayaṃpi kho bhikkhave pariyāyo yaṃ pariyāyaṃ āgamma sekkho bhikkhu sekkhabhūmiyaṃ saṇṭhito sekkhosmīti pajānāti.

Puna caparaṃ bhikkhave sekkho bhikkhu pañcindriyāni pajānāti saddhindriyaṃ viriyindriyaṃ satindriyaṃ samādhindriyaṃ paññindriyaṃ . yaṃgatikāni yaṃparamāni yaṃphalāni yaṃpariyosānāni na heva kho kāyena phusitvā viharati paññāya ca ativijjha passati. Ayaṃpi kho bhikkhave pariyāyo yaṃ pariyāyaṃ āgamma sekkho bhikkhu sekkhabhūmiyaṃ saṇṭhito sekkhosmīti pajānāti.

Katamo ca bhikkhave pariyāyo yaṃ pariyāyaṃ āgamma asekkho bhikkhu asekkhabhūmiyaṃ saṇṭhito asekkhosmīti pajānāti . Idha bhikkhave asekkho bhikkhu pañcindriyāni pajānāti . saddhindriyaṃ viriyindriyaṃ satindriyaṃ samādhindriyaṃ paññindriyaṃ . Yaṃgatikāni yaṃparamāni yaṃphalāni yaṃpariyosānāni kāyena ca phusitvā viharati paññāya ca ativijjha passati . ayaṃpi kho bhikkhave pariyāyo yaṃ pariyāyaṃ āgamma asekkho bhikkhu asekkhabhūmiyaṃ saṇṭhito asekkhosmīti pajānāti.

Puna caparaṃ bhikkhave asekkho bhikkhu cha indriyāni pajānāti cakkhundriyaṃ sotindriyaṃ ghānindriyaṃ jivhindriyaṃ kāyindriyaṃ manindriyaṃ . imāni kho cha indriyāni sabbena sabbaṃ sabbathā Sabbaṃ aparisesā nirujjhissanti aññāni ca cha indriyāni na kuhiñci kismiñci uppajjissantīti pajānāti . ayaṃpi kho bhikkhave pariyāyo yaṃ pariyāyaṃ āgamma asekkho bhikkhu asekkhabhūmiyaṃ saṇṭhito asekkhosmīti pajānātīti.