โมคคัลลานสูตร

๔. โมคฺคลฺลานสุตฺตวณฺณนา

จตุตฺเถ อุทฺธตาติ อุทฺธจฺจปกติกา วิปฺผนฺทมานจิตฺตา. อุทฺธจฺเจน หิ เอการมฺมเณ จิตฺตํ วิปฺผนฺทติ ธชยฏฺฐิยํ วาเตน ปหตา วิย. ๑- อุนฺนฬาติ อุคฺคตนฬา, อุฏฺฐิตตุจฺฉมานาติ วุตฺตํ โหติ. จปลาติ ปตฺตจีวรมณฺฑนาทิจาปลฺเลน ยุตฺตา. มุขราติ มุขขรา, ขรวจนาติ วุตฺตํ โหติ. วิกิณฺณวาจาติ อสญฺญตวจนา ทิวสมฺปิ นิรตฺถกวจนปฺปลาปิโน. มุฏฺฐสฺสติโนติ นฏฺฐสฺสติโน. อสมฺปชานาติ ปญฺญารหิตา. อสมาหิตาติ อุปจารปฺปนาสมาธิวิรหิตา. วิพฺภนฺตจิตฺตาติ ๒- อุพฺภนฺตจิตฺตา สมาธิวิรเหน ลทฺโธกาเสน อุทฺธจฺเจน. ปากตินฺทฺริยาติ อสํวุตินฺทฺริยา. อิทฺธาภิสงฺขารนฺติ อาโปกสิณํ สมาปชฺชิตฺวา วุฏฺฐาย ปาสาเทน ปติฏฺฐิตํ ปฐวิภาคํ "อุทกนฺ"ติ อธิฏฺฐาย อุทกปิฏฺเฐ ฐิตํ ปาสาทํ เวหาสํ อพฺภุคฺคนฺตฺวา องฺคุฏฺฐเกน ปหริ. คมฺภีรเนโมติ คมฺภีรอาวาโฏ, คมฺภีรภูมิภาคํ อนุปติฏฺโฐติ อตฺโถ. สุนิขาโตติ สุฏฺฐุ นิขาโต, โกฏฺเฏตฺวา สุฏฺฐุ ฐปิโตติ ๓- อิธ อภิญฺญาปาทกิทฺธิ ๔- กถิตา.