ติรัจฉานกถาสูตร

TIPITAKA Volume 19 : PALI ROMAN Sutta Pitaka Vol 11 : Sutta. Saṃ. Ma.

[1663] Mā bhikkhave anekavihitaṃ tiracchānakathaṃ kathetha 1- . Seyyathīdaṃ. Rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ 2- annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ ñātikathaṃ yānakathaṃ gāmakathaṃ nigamakathaṃ nagarakathaṃ janapadakathaṃ itthīkathaṃ purisakathaṃ 3- surākathaṃ 4- visikhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddakkhāyikaṃ itibhavābhavakathaṃ iti vā . taṃ kissa hetu . nesā bhikkhave kathā atthasañhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati . kathentā ca kho tumhe bhikkhave idaṃ dukkhanti katheyyātha ayaṃ dukkhasamudayoti katheyyātha ayaṃ dukkhanirodhoti katheyyātha ayaṃ dukkhanirodhagāminī paṭipadāti katheyyātha . taṃ kissa hetu . esā bhikkhave kathā atthasañhitā esā ādibrahmacariyakā esā nibbidāya virāgāya nirodhāya upasamāya abhiññāya sambodhāya nibbānāya saṃvattati . tasmā tiha bhikkhave idaṃ dukkhanti yogo karaṇīyo .pe. ayaṃ dukkhanirodhagāminī paṭipadāti yogo karaṇīyoti. Samādhivaggo paṭhamo. @Footnote: 1 Ma. Yu. katheyyātha. 2 Yu. suddhakathaṃ. 3 Ma. ayaṃ pāṭho natthi. @ 4 sūrakathantipi pāṭho. Tassuddānaṃ samādhipaṭisallānā kulaputtā apare dve samaṇabrāhmaṇavitakka- 1- cintā viggāhikā kathāti 2- . --------- @Footnote: 1 Ma. samaṇabrāhmaṇā vitakkaṃ. Yu. samaṇabrāhmaṇā vitakkā. 2 Sī. kathena cāti.