วาทีสูตร

Yo hi koci bhikkhave bhikkhu idaṃ dukkhanti yathābhūtaṃ pajānāti .pe. ayaṃ dukkhanirodhagāminī paṭipadāti yathābhūtaṃ pajānāti . Puratthimāya cepi disāya āgaccheyya samaṇo vā brāhmaṇo vā @Footnote: 1 Yu. naṃ. evamupari. 2 Ma. Yu. ye ca kho keci. Vādatthiko vādagavesī vādamassa āropessāmīti . taṃ vata sahadhammena saṅkampessati vā sampakampessati vā sampacālessati vāti netaṃ ṭhānaṃ vijjati . pacchimāya cepi disāya . uttarāya cepi disāya . dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī vādamassa āropessāmīti . Taṃ vata sahadhammena saṅkampessati vā sampakampessati vā sampacālessati vāti netaṃ ṭhānaṃ vijjati . seyyathāpi bhikkhave silāyūpo soḷasakukkuko 1- tassassu aṭṭhakukku heṭṭhānemaṅgamā aṭṭhakukku uparinemassa puratthimāya cepi disāya āgaccheyya bhusā vātavuṭṭhi neva saṅkampeyya na sampakampeyya na sampacāleyya pacchimāya cepi disāya . uttarāya cepi disāya . dakkhiṇāya cepi disāya āgaccheyya bhusā vātavuṭṭhi neva saṅkampeyya na sampakampeyya na sampacāleyya . taṃ kissa hetu . gambhīrattā bhikkhave nemassa sunikhātattā silāyūpassa. {1724.1} Evameva kho bhikkhave yo hi koci bhikkhu idaṃ dukkhanti yathābhūtaṃ pajānāti .pe. ayaṃ dukkhanirodhagāminī paṭipadāti yathābhūtaṃ pajānāti . puratthimāya cepi disāya āgaccheyya samaṇo vā brāhmaṇo vā vādatthiko vādagavesī vādamassa āropessāmīti . Taṃ vata sahadhammena saṅkampessati vā sampakampessati vā sampacālessati vāti netaṃ ṭhānaṃ vijjati . pacchimāya cepi disāya. @Footnote: 1 soḷalakukkūtipi pāṭho. Uttarāya cepi disāya . dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī vādamassa āropessāmīti. Taṃ vata sahadhammena saṅkampessati vā sampakampessati vā sampacālessati vāti netaṃ ṭhānaṃ vijjati . taṃ kissa hetu. Sudiṭṭhattā bhikkhave catunnaṃ ariyasaccānaṃ . katamesaṃ catunnaṃ . dukkhassa ariyasaccassa .pe. Dukkhanirodhagāminīpaṭipadāya ariyasaccassa . tasmā tiha bhikkhave idaṃ dukkhanti yogo karaṇīyo .pe. ayaṃ dukkhanirodhagāminī paṭipadāti yogo karaṇīyoti. Sīsapāpaṇṇavaggo 1- catuttho. Tassuddānaṃ sīsapā khadiro daṇḍo celā sattisatena ca pāṇā suriyūpamā dvedhā indakhīlo ca vādināti 2- . ---------------------- @Footnote: 1 sīsapāvanavaggoti vā pāṭho. 2 Ma. Yu. vādinoti.