โอฆสูตร

๘. โอฆวคฺค

๑-๒. โอฆสุตฺตาทิวณฺณนา

[๑๗๒-๑๗๓] โอฆวคฺเค กาโมโฆติ ปญฺจสุ กามคุเณสุ ฉนฺทราโค. ภโวโฆติ รูปารูปภเวสุ ฉนฺทราโค. ทิฏฺโฐโฆติ ทฺวาสฏฺฐิทิฏฺฐิโย. อวิชฺโชโฆติ จตูสุ สจฺเจสุ อญฺญาณํ. กามโยคาทีสุปิ เอเสว นโย.

๓-๔. อุปาทานสุตฺตาทิวณฺณนา

[๑๗๔-๑๗๕] กามุปาทานนฺติ กามคฺคหณํ. ทิฏฺฐุปาทานาทีสุปิ เอเสว นโย. คนฺถาติ คนฺถนา ฆฏนา. กายคนฺโถติ กามกายสฺส คนฺโถ คนฺถนฏนกิเลโส. อิทํ สจฺจาภินิเวโสติ อนฺตคาหิกทิฏฺฐิวเสน อุปฺปนฺโน "อิทเมว สจฺจนฺ"ติ เอวํ อภินิเวโส.

๕-๑๐. อนุสยสุตฺตาทิวณฺณนา

[๑๗๖-๑๘๑] กามราคานุสโยติ ถามคตฏฺเฐน กามราโคว อนุสโย กามราคานุสโย. เสเสสุปิ เอเสว นโย. โอรมฺภาคิยานีติ เหฏฺฐาโกฏฺฐาสิยานิ. สํโยชนานีติ พนฺธนานิ. อุทฺธมฺภาคิยานีติ อุปริโกฏฺฐาสิยานิ. เสสํ สพฺพตฺถ อุตฺตานตฺถเมวาติ.

โอฆวคฺโค.

มคฺคสํยุตฺตวณฺณนา นิฏฺฐิตา.