สิกขาบทที่ ๑ เรื่องพระอานนท์

{269} Acelakavaggassa paṭhamasikkhāpade. Parivesananti parivisanaṭṭhānaṃ. Paribbājakasamāpannoti pabbajjaṃ samāpanno. Deti āpatti pācittiyassāti samatittikaṃ yāgubhattaṃ ekappayogena deti ekaṃ pācitciyaṃ. Avacchinditvā avacchinditvā deti payoge payoge pācittiyaṃ. Eseva nayo pūvabhattādīsu. Titthiye atitthiyasaññīti mātā vā pitā vā titthiyesu pabbajanti tesaṃ mātāpitusaññāya dentassāpi pācittiyameva hoti. Dāpetīti anupasampannena dāpeti. {273} Upanikkhipitvā detīti tathārūpe bhājane ṭhapetvā taṃ bhājanaṃ tesaṃ santike bhūmiyaṃ nikkhipitvā deti tesaṃ vā bhājanaṃ nikkhipāpetvā tattha deti. Pattaṃ ādhārake vā bhūmiyaṃ vā ṭhapetvāpi ito gaṇhāthāti vattuṃ vaṭṭati. Sace titthiyo vadati mayhaṃ nāma idaṃ santakaṃ idha naṃ ākīrathāti ākīritabbaṃ. Tassa santakattā sahatthā dānaṃ nāma na hoti. Sesamettha uttānameva.

Eḷakalomasamuṭṭhānaṃ kiriyā nosaññāvimokkhaṃ acittakaṃ paṇṇattivajjaṃ kāyakammaṃ ticittaṃ tivedananti.

Acelakasikkhāpadaṃ paṭhamaṃ.