สิกขาบทที่ ๘ เรื่องพระฉัพพัคคีย์

{311} Aṭṭhame. Abbhuyyātoti abhiuyyāto parasenaṃ abhimukho gamissāmīti nagarato niggatoti attho. Uyyuttanti katauyyātaṃ gāmato nikkhantanti attho. {314} Dvādasapuriso hatthīti cattāro Ārohakā ekekapādarakkhakā dve dveti evaṃ dvādasapuriso hoti. Tipuriso assoti eko ārohako dve pādarakkhakāti evaṃ tipuriso hoti. Catuppuriso rathoti eko sārathi eko yodho dve āṇirakkhakāti evaṃ catuppuriso hoti. Cattāro purisā sarahatthāti āvudhahatthā cattāro purisāti. Ayaṃ pacchimakoṭiyā caturaṅgasamannāgatā senā nāma. Īdisaṃ senaṃ dassanāya gacchato pade pade dukkaṭaṃ. Dassanūpacāraṃ vijahitvāti kenaci antaritā vā ninnaṃ oruḷhā vā na dissati idha ṭhatvā na sakkā daṭṭhunti aññaṃ ṭhānaṃ gantvā passato payoge payoge pācittiyanti attho. {315} Ekamekanti hatthīādīsu catūsu aṅgesu ekamekaṃ antamaso ekapurisāruḷhakahatthiṃpi ekaṃpi sarahatthaṃ purisaṃ. Anuyyuttā nāma rājā uyyānaṃ vā nadiṃ vā gacchati evaṃ anuyyuttā hoti. {316} Āpadāsūti jīvitabrahmacariyantarāyesu sati ettha gato muccissāmīti gacchato anāpatti. Sesamettha uttānameva. Eḷakalomasamuṭṭhānaṃ kiriyā nosaññāvimokkhaṃ acittakaṃ lokavajjaṃ kāyakammaṃ akusalacittaṃ tivedananti.

Uyyuttasikkhāpadaṃ aṭṭhamaṃ.