สิกขาบทที่ ๖ เรื่องภิกษุหลายรูป

{350} Chaṭṭhasikkhāpade. Bhaggāti janapadassetaṃ nāmaṃ. Suṃsumāragīranti nagarassa nāmaṃ. Bhesakalāvananti tannissitavanassa nāmaṃ. Taṃ pana migānaṃ phāsuvihāratthāya dinnattā migadāyāti vuccati. Samādahitvāti jāletvā. Paripātesīti anubandhi. {354-355} Sayaṃ samādahatīti ettha jotiṃ samādahitukāmatāya araṇīsaṇṭhapanato paṭṭhāya yāva jālā na uṭṭhahati tāva sabbapayogesu dukkaṭaṃ. {352} Padīpepīti padīpujjalanepi. Jotikepīti pattapacanasedakammādīsu jotikaraṇe. Tathārūpapaccayāti padīpādipaccayā. Paṭilātaṃ ukkhipatīti ḍayhamānaṃ alātaṃ patati taṃ ukkhipati puna yathāṭhāne ṭhapetīti attho. Evaṃ avijjhātaṃ ukkhipitvā pakkhipantasseva dukkaṭaṃ. Vijjhātaṃ pana jālāpentassa pācittiyameva. {356} Tathārūpapaccayāti ṭhapetvā padīpādīni aññenapi tathārūpena paccayena samādahantassa anāpatti. Āpadāsūti sappadaṭṭhacoraruddhabāḷamigaamanussehi upaddavo hoti Tattha samādahantassāpi anāpatti. Sesaṃ uttānameva. Chassamuṭṭhānaṃ kiriyā nosaññāvimokkhaṃ acittakaṃ paṇṇattivajjaṃ kāyakammaṃ vacīkammaṃ ticittaṃ tivedananti.

Jotisamādahanasikkhāpadaṃ chaṭṭhaṃ.