สิกขาบทที่ ๘ เรื่องภิกษุหลายรูป

{368-369} Aṭṭhamasikkhāpade. Navaṃ pana bhikkhunā cīvaralābhenāti ettha alabhīti labho labhoeva lābho. Kiṃ alabhi. Cīvaraṃ. Kīdisaṃ. Navaṃ. Iti navacīvaralābhenāti vattabbe anunāsikalopaṃ akatvā navaṃ cīvaralābhenāti vuttaṃ. Paṭiladdhanavacīvarenāti attho. Majjhe ṭhitapadadvaye panāti nipāto. Bhikkhunāti yena laddhaṃ tassa nidassanaṃ. Padabhājane pana byañjanaṃ anādiyitvā yaṃ laddhaṃ taṃ dassetuṃ cīvaraṃ nāma channaṃ cīvarānantiādi vuttaṃ. Cīvaranti cettha yaṃ nivāsetuṃ vā pārupituṃ vā sakkā hoti tadeva veditabbaṃ. Teneva vikappanūpagaṃ pacchimanti na vuttaṃ. Kaṃsanīlanti cammakāranīlaṃ. Mahāpaccariyaṃ pana ayamalaṃ lohamalaṃ etaṃ kaṃsanīlaṃ nāmāti vuttaṃ. Palāsanīlanti yo koci nīlavaṇṇo paṇṇakaraso. Dubbaṇṇakaraṇaṃ ādātabbanti etaṃ kappabinduṃ sandhāya vuttaṃ. Na nīlādīhi sakalacīvarassa dubbaṇṇakaraṇaṃ. Tañca pana kappaṃ ādiyantena cīvaraṃ rajitvā catūsu vā koṇesu tīsu vā dvīsu vā ekasmiṃ vā koṇe morassa akkhimaṇḍalamattaṃ vā maṅkuṇapiṭṭhimattaṃ vā ādātabbaṃ. Mahāpaccariyaṃ paṭe vā gaṇṭhiyaṃ vā na vaṭṭatīti vuttaṃ. Mahāaṭṭhakathāyaṃ pana vaṭṭatiyevāti vuttaṃ. Pālikappakaṇṇikakappādayo pana sabbattha paṭisiddhā tasmā ṭhapetvā ekaṃ vaṭṭabinduṃ aññena kenacipi vikārena kappo na kātabbo. {371} Aggaḷeti ādīsu etāni aggaḷādīni kappakatacīvare pacchā āropetvā kappakaraṇakiccaṃ natthi. Sesaṃ uttānameva. Eḷakalomasamuṭṭhānaṃ kiriyākiriyaṃ nosaññāvimokkhaṃ acittakaṃ paṇṇattivajjaṃ kāyakammaṃ ticittaṃ tivedananti.

Dubbaṇṇakaraṇasikkhāpadaṃ aṭṭhamaṃ.