สิกขาบทที่ ๓ เรื่องพระฉัพพัคคีย์

Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū jānaṃ yathādhammaṃ nīhatādhikaraṇaṃ punakammāya ukkoṭenti akataṃ kammaṃ dukkaṭaṃ kammaṃ puna kātabbaṃ kammaṃ anīhataṃ dunnīhataṃ puna nīhanitabbanti . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū jānaṃ yathādhammaṃ nīhatādhikaraṇaṃ punakammāya ukkoṭessantīti .pe. saccaṃ kira tumhe bhikkhave jānaṃ yathādhammaṃ nīhatādhikaraṇaṃ punakammāya ukkoṭethāti . Saccaṃ bhagavāti . vigarahi buddho bhagavā kathaṃ hi nāma tumhe moghapurisā jānaṃ yathādhammaṃ nīhatādhikaraṇaṃ punakammāya ukkoṭessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {639.1} yo pana bhikkhu jānaṃ yathādhammaṃ nīhatādhikaraṇaṃ punakammāya ukkoṭeyya pācittiyanti.

Yo panāti yo yādiso .pe. bhikkhūti .pe. ayaṃ imasmiṃ atthe adhippeto bhikkhūti . jānāti nāma sāmaṃ vā jānāti aññe vā tassa ārocenti so vā āroceti . Yathādhammaṃ nāma dhammena vinayena satthu sāsanena kataṃ etaṃ yathādhammaṃ nāma.

Adhikaraṇaṃ nāma cattāri adhikaraṇāni vivādādhikaraṇaṃ anuvādādhikaraṇaṃ āpattādhikaraṇaṃ kiccādhikaraṇaṃ . punakammāya ukkoṭeyyāti akataṃ kammaṃ dukkaṭaṃ kammaṃ puna kātabbaṃ kammaṃ anīhataṃ dunnīhataṃ puna nīhanitabbanti ukkoṭeti āpatti pācittiyassa.

Dhammakamme dhammakammasaññī ukkoṭeti āpatti pācittiyassa . dhammakamme vematiko ukkoṭeti āpatti dukkaṭassa . dhammakamme adhammakammasaññī ukkoṭeti anāpatti . Adhammakamme dhammakammasaññī āpatti dukkaṭassa . adhammakamme vematiko āpatti dukkaṭassa . adhammakamme adhammakammasaññī anāpatti.

Anāpatti adhammena vā vaggena vā nakammārahassa vā kammaṃ katanti jānanto ukkoṭeti ummattakassa ādikammikassāti. Tatiyasikkhāpadaṃ niṭṭhitaṃ.