สิกขาบทที่ ๓ เรื่องพระฉัพพัคคีย์

{๔๔๔} ตติยสิกฺขาปเท ฯ อนฺวฑฺฒมาสนฺติ อนุปฏิปาฏิยา อฑฺฒมาเส อฑฺฒมาเส ฯ ยสฺมา ปน โส อุโปสถทิวเส อุทฺทิสิยติ ตสฺมา อนุโปสถิกนฺติ ๑- ปทภาชเน วุตฺตํ ฯ อุทฺทิสฺสมาเนติ อุทฺทิสิยมาเน ฯ ยสฺมา ปน โส ปาฏิโมกฺขุทฺเทสเกน อุทฺทิสนฺเตน อุทฺทิสิยมาโน นาม โหติ ตสฺมา อุทฺทิสนฺเตติ ปทภาชเน วุตฺตํ ฯ ยญฺจ ตตฺถ อาปตฺตึ อาปนฺโนติ ตสฺมึ อนาจาเร อาจิณฺเณ ยํ อาปตฺตึ อาปนฺโน ฯ ยถาธมฺโม กาเรตพฺโพติ อญฺญาเณน อาปนฺนตฺตา ตสฺส อาปตฺติยา โมกฺโข นตฺถิ ฯ ยถา ปน ธมฺโม จ วินโย จ ฐิโต ตถา กาเรตพฺโพ ฯ เทสนาคามินิญฺจ อาปนฺโน โหติ เทสาเปตพฺโพ วุฏฺฐานคามินิญฺจ วุฏฺฐาเปตพฺโพติ อตฺโถ ฯ สาธุกนฺติ สุฏฺฐุ ฯ อฏฺฐิกตฺวาติ อฏฺฐิกภาวํ กตฺวา ฯ อตฺถิโก หุตฺวาติ วุตฺตํ โหติ ฯ {๔๔๗} ธมฺมกมฺเมติอาทีสุ โมหาโรปนกมฺมํ อธิปฺเปตํ ฯ เสสเมตฺถ อุตฺตานเมว ฯ ติสมุฏฺฐานํ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ

โมหนสิกฺขาปทํ ตติยํ ฯ

@เชิงอรรถ: ๑. ยํ อนวฑฺฒมาสนฺติ อนุโปสถิกนฺติ ปทภาชเน วุตฺตํ ตํ เอตฺตกํ ตสฺส ภควโต

@สุตฺตาคตํ สุตฺตปริยาปนฺนํ อนฺวฑฺฒมาสํ อุทฺเทสํ อาคจฺฉตีติ มาติกาย น สเมติ.