สิกขาบทที่ ๓ เรื่องพระฉัพพัคคีย์

{๕๐๘} ตติยสิกฺขาปเท ฯ ติรจฺฉานกถนฺติ อริยมคฺคสฺส ติรจฺฉานภูตํ กถํ ฯ ราชกถนฺติ ราชปฏิสํยุตฺตํ กถํ ฯ โจรกถาทีสุปิ เอเสว นโย ฯ {๕๑๒} สนฺตํ ภิกฺขุนฺติ เอตฺถ ยํ วตฺตพฺพํ ตํ จาริตฺตสิกฺขาปเท วุตฺตนยเมว ฯ สเจ สมฺพหุลา เกนจิ กมฺเมน คามํ ปวิสนฺติ วิกาเล คามปฺปเวสนํ อาปุจฺฉามาติ สพฺเพหิ อญฺญมญฺญํ อาปุจฺฉิตพฺพํ ฯ ตสฺมึ คาเม ตํ กมฺมํ น สมฺปชฺชตีติ อญฺญํ คามํ คจฺฉนฺติ คามสตํปิ โหตุ ปุน อาปุจฺฉนกิจฺจํ นตฺถิ ฯ สเจ ปน อุสฺสาหํ ปฏิปฺปสฺสมฺเภตฺวา วิหารํ คจฺฉนฺตา อนฺตรา อญฺญํ คามํ ปวิสิตุกามา โหนฺติ อาปุจฺฉิตพฺพเมว ฯ กุลฆเร วา อาสนสาลายํ วา ภตฺตกิจฺจํ กตฺวา เตลภิกฺขาย วา สปฺปิภิกฺขาย วา จริตุกาโม โหติ ฯ สเจ ปสฺเส ภิกฺขุ อตฺถิ อาปุจฺฉิตฺวา คนฺตพฺพํ ฯ อสนฺเต นตฺถีติ คนฺตพฺพํ ฯ วีถึ โอตริตฺวา ภิกฺขุํ ปสฺสติ อาปุจฺฉนกิจฺจํ นตฺถิ ฯ อนาปุจฺฉิตฺวาปิ จริตพฺพเมว ฯ คามมชฺเฌน มคฺโค โหติ ฯ เตน คจฺฉนฺตสฺส เตลาทิภิกฺขาย จริสฺสามีติ จิตฺเต อุปฺปนฺเน สเจ ปสฺเส ภิกฺขุ อตฺถิ อาปุจฺฉิตฺวา จริตพฺพํ ฯ มคฺคา อโนกฺกมฺม จรนฺตสฺส ปน อาปุจฺฉนกิจฺจํ นตฺถิ ฯ อปริกฺขิตฺตสฺส คามสฺส อุปจาโร อทินฺนาทาเน วุตฺตนเยเนว เวทิตพฺโพ ฯ {๕๑๕} อนฺตรารามนฺติ อาทีสุ น เกวลํ อนาปุจฺฉา กายพนฺธนํ อพนฺธิตฺวา สงฺฆาฏึ อปารุปิตฺวา คจฺฉนฺตสฺสาปิ อนาปตฺติ ฯ อาปทาสูติ สีโห วา พฺยคฺโฆ วา อาคจฺฉติ เมโฆ วา อุฏฺฐหติ อญฺโญ วา โกจิ อุปทฺทโว อุปฺปชฺชติ อนาปตฺติ ฯ เอวรูปาสุ อาปทาสุ พหิคามโต อนฺโตคามํ ปวิสิตุํ วฏฺฏติ ฯ เสสเมตฺถ อุตฺตานเมว ฯ

กฐินสมุฏฺฐานํ กายวาจโต กายวาจาจิตฺตโต จ สมุฏฺฐาติ กิริยากิริยํ โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ

วิกาเล คามปฺปเวสนสิกฺขาปทํ ตติยํ ฯ