สิกขาบทที่ ๖ เรื่องพระฉัพพัคคีย์

Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū varaseyyāyo palibuddhanti 1- there 2- bhikkhū vuṭṭhāpenti . Athakho chabbaggiyānaṃ bhikkhūnaṃ etadahosi kena nu kho mayaṃ upāyena idheva vassaṃ vaseyyāmāti . athakho chabbaggiyā bhikkhū there bhikkhū anūpakhajja seyyaṃ kappenti yassa sambādho bhavissati so pakkamissatīti . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū there bhikkhū anūpakhajja seyyaṃ kappessantīti. {383.1} Athakho te bhikkhū bhagavato etamatthaṃ ārocesuṃ .pe. Saccaṃ kira tumhe bhikkhave there bhikkhū anūpakhajja seyyaṃ kappethāti. Saccaṃ bhagavāti . vigarahi buddho bhagavā kathaṃ hi nāma tumhe moghapurisā there bhikkhū anūpakhajja seyyaṃ kappessatha netaṃ moghapurisā appasannānaṃ vā pasādāya .pe. Evañca pana bhikkhave imaṃ sikkhāpadaṃ uddiseyyātha {383.2} yo pana bhikkhu saṅghike vihāre jānaṃ pubbūpagataṃ bhakkhuṃ anūpakhajja seyyaṃ kappeyya yassa sambādho bhavissati so pakkamissatīti etadeva paccayaṃ karitvā anaññaṃ pācittiyanti.

Yo panāti yo yādiso .pe. bhikkhūti .pe. ayaṃ @Footnote: 1 Ma. palibundhenti . 2 Ma. therā. Imasmiṃ atthe adhippeto bhikkhūti . saṅghiko nāma vihāro saṅghassa dinno hoti pariccatto . jānāti nāma vuḍḍhoti jānāti gilānoti jānāti saṅghena dinnoti jānāti . anūpakhajjāti anūpavisitvā . seyyaṃ kappeyyāti mañcassa vā pīṭhassa vā pavisantassa vā nikkhamantassa vā upacāre seyyaṃ santharati vā santharāpeti vā āpatti dukkaṭassa abhinisīdati vā abhinipajjati vā āpatti pācittiyassa . etadeva paccayaṃ karitvā anaññanti na añño koci paccayo hoti anūpakhajja seyyaṃ kappetuṃ.

Saṅghike saṅghikasaññī anūpakhajja seyyaṃ kappeti āpatti pācittiyassa . saṅghike vematiko anūpakhajja seyyaṃ kappeti āpatti pācittiyassa . saṅghike puggalikasaññī anūpakhajja seyyaṃ kappeti āpatti pācittiyassa . mañcassa vā pīṭhassa vā pavisantassa vā nikkhamantassa vā upacāraṃ ṭhapetvā seyyaṃ santharati vā santharāpeti vā āpatti dukkaṭassa . abhinisīdati vā abhinipajjati vā āpatti dukkaṭassa . vihārassa upacāre vā upaṭṭhānasālāyaṃ vā maṇḍape vā rukkhamūle vā ajjhokāse vā seyyaṃ santharati vā santharāpeti vā āpatti dukkaṭassa . Abhinisīdati vā abhinipajjati vā āpatti dukkaṭassa . puggalike saṅghikasaññī āpatti dukkaṭassa . puggalike vematiko āpatti dukkaṭassa . puggalike puggalikasaññī aññassa puggalike āpatti Dukkaṭassa. Attano puggalike anāpatti.

Anāpatti gilāno pavisati sītena vā uṇhena vā pīḷito pavisati āpadāsu ummattakassa ādikammikassāti. Chaṭṭhasikkhāpadaṃ niṭṭhitaṃ. -------