สิกขาบทที่ ๔ เรื่องพระฉัพพัคคีย์

{164} Catutthasikkhāpade. Na bahukatāti na katabahumānā. Na dhammabahumānaṃ katvā ovadantīti adhippāyo. Bhikkhunovādakaṃ avaṇṇaṃ kattukāmoti ādīnaṃ ujjhāpanake vuttanayenevattho veditabbo. Upasampannaṃ saṅghena asammatanti ettha asammato nāma sammatena vā saṅghena vā bhāraṃ katvā ṭhapito veditabbo. Anupasampannaṃ saṅghena sammata vā asammataṃ vāti ettha pana Bhikkhukāle sammatiṃ labhitvā sāmaṇerabhūmiyaṃ ṭhito sammato. Sammatena vā saṅghena vā ṭhapito bahussuto sāmaṇero asammatoti veditabbo. Sesaṃ vuttanayattā uttānameva. Tisamuṭṭhānaṃ kāyacittato vācācittato kāyavācācittato ca samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dukkhavedananti.

Āmisasikkhāpadaṃ catutthaṃ.