สิกขาบทที่ ๖ เรื่องพระอุทายี

{๑๗๕} ฉฏฺฐสิกฺขาปเท ฯ อุทายีติ โลลุทายิ ฯ ปฏฺโฐติ ปฏิพโล ฯ นิปุโณ เจว สมตฺโถ จาติ วุตฺตํ โหติ ฯ อญฺญตรา ภิกฺขุนีติ ตสฺเสว ปุราณทุติยิกา ฯ ปฏิภาณจิตฺตนฺติ อตฺตโน ปฏิภาเณน กตจิตฺตํ ฯ โส กิร จีวรํ รชิตฺวา ตสฺส มชฺเฌ นานาวณฺเณหิ วิปฺปกตเมถุนํ อิตฺถีปุริสรูปมกาสิ ฯ เตน วุตฺตํ มชฺเฌ ปฏิภาณจิตฺตํ วุฏฺฐาเปตฺวาติ ฯ ยถาสํหฏนฺติ ยถาสํหริตเมว ฯ จีวรนฺติ ยํ นิวาสิตุํ วา ปารุปิตุํ วา สกฺกา โหติ ฯ เอวํ หิ มหาปจฺจริยาทีสุ วุตฺตํ ฯ สยํ สิพฺเพตีติ เอตฺถ สิพฺพิสฺสามีติ วิจาเรนฺตสฺสาปิ ฉินฺทนฺตสฺสาปิ ทุกฺกฏํ ฯ สิพฺพนฺตสฺส ปน อาราปเถ อาราปเถติ สูจึ ปเวเสตฺวา ปเวเสตฺวา นีหรเณ ฯ สเจ ปน สกลสูจึ อนีหรนฺโต ทีฆสุตฺตํ ปเวสนตฺถํ สตกฺขตฺตุํปิ วิชฺฌิตฺวา นีหรติ เอกเมว ปาจิตฺติยํ ฯ สกึ อาณตฺโตติ สกึ จีวรํ สิพฺพาติ วุตฺโต ฯ พหุมฺปิ สิพฺพตีติ สเจปิ สพฺพํ สูจิกมฺมํ ปริโยสาเปตฺวา จีวเร นิฏฺฐาเปติ เอกเมว ปาจิตฺติยํ ฯ อถ ปน อิมสฺมึ จีวเร กตฺตพฺพกมฺมํ ตว ภาโรติ วุตฺโต กโรติ อาณตฺตสฺส อาราปเถ อาราปเถ เอกเมกํ ปาจิตฺติยํ ฯ อาณาปกสฺส เอกวาจาย สมฺพหุลานิปิ ฯ ปุนปฺปุนํ อาณตฺติยํ ปน วตฺตพฺพเมว นตฺถิ ฯ

เยปิ สเจ อาจริยูปชฺฌาเยสุ อตฺตโน ญาติกานํ จีวรํ สิพฺพนฺเตสุ เตสํ นิสฺสิตกา อาจริยูปชฺฌายวตฺตํ วา กฐินวตฺตํ วา กโรมาติ สิพฺพนฺติ เตสมฺปิ อาราปถคณนาย อาปตฺติโย ฯ อาจริยูปชฺฌายา อตฺตโน ญาติกานํ อนฺเตวาสิเกหิ สิพฺพาเปนฺติ อาจริยูปชฺฌายานํ ทุกฺกฏํ อนฺเตวาสิกานํ ปาจิตฺติยํ ฯ อนฺเตวาสิกา อตฺตโน ญาติกานํ อาจริยูปชฺฌาเยหิ สิพฺพาเปนฺติ ตตฺราปิ เอเสว นโย อนฺเตวาสิกานํปิ อาจริยูปชฺฌายานิปิ ญาติกาย จีวรํ โหติ ฯ อาจริยูปชฺฌายา ปน อนฺเตวาสิเก วญฺเจตฺวา สิพฺพาเปนฺติ อุภินฺนํปิ ทุกฺกฏํ ฯ กสฺมา ฯ อนฺเตวาสิกานํ อญฺญาตกสญฺญาย สิพฺพิตตฺตา อิตเรสํ อกปฺปิเย นิโยชิตตฺตา ฯ ตสฺมา อิทนฺเต มาตุ จีวรํ อิทญฺจ ภคินิยาติ อาจิกฺขิตฺวา สิพฺพาเปตพฺพํ ฯ {๑๗๙} อญฺญํ ปริกฺขารนฺติ ยงฺกิญฺจิ อุปาหนตฺถวิกาทิ ฯ เสสํ อุตฺตานเมว ฯ ฉสฺสมุฏฺฐานํ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ

จีวรสิพฺพนสิกฺขาปทํ ฉฏฺฐํ ฯ