{๖๒๖} เตน สมเยนาติ วสฺสิกสาฏิกสิกฺขาปทํ ฯ ตตฺถ วสฺสิกสาฏิกา อนุญฺญาตาติ จีวรกฺขนฺธเก วิสาขาวตฺถุสฺมึ อนุญฺญาตา ฯ ปฏิกจฺเจวาติ ปุเรเยว ฯ {๖๒๗} มาโส เสโส คิมฺหานนฺติ จตุนฺนํ คิมฺหมาสานํ เอโก ปจฺฉิมมาโส เสโส ฯ กตฺวาติ สิพฺพนรชนกปฺปปริโยสาเนน นิฏฺฐาเปตฺวา ฯ กโรนฺเตน จ เอกเมว กตฺวา สมเย อธิฏฺฐาตพฺพํ เทฺว อธิฏฺฐาตุํ น วฏฺฏติ ฯ อติเรกมาเส เสเส คิมฺหาเนติ คิมฺหานนามเก อติเรกมาเส เสเส ฯ อติเรกฑฺฒมาเส เสเส คิมฺหาเน กตฺวา นิวาเสตีติ เอตฺถ ปน ฐตฺวา วสฺสิกสาฏิกาย ปริเยสนกฺเขตฺตํ กรณกฺเขตฺตํ นิวาสนกฺเขตฺตํ อธิฏฺฐานกฺเขตฺตนฺติ จตุพฺพิธํ เขตฺตํ กุจฺฉิสมโย ปิฏฺฐิสมโยติ ทุวิโธ สมโย ปิฏฺฐิสมยจตุกฺกํ กุจฺฉิสมยจตุกฺกนฺติ เทฺว จตุกฺกานิ จ เวทิตพฺพานิ ฯ ตตฺถ เชฏฺฐมูลปุณฺณมาสิยา ปจฺฉิมปาฏิปททิวสโต ปฏฺฐาย ยาว กาฬปกฺขูโปสถา อยเมโก อฑฺฒมาโส ปริเยสนกฺเขตฺตญฺเจว กรณกฺเขตฺตญฺจ ฯ เอตสฺมึ หิ อนฺตเร วสฺสิกสาฏิกํ อลทฺธํ ปริเยสิตุํ ลทฺธํ กาตุญฺจ วฏฺฏติ นิวาเสตุํ อธิฏฺฐาตุญฺจ น วฏฺฏติ ฯ กาฬปกฺขูโปสถสฺส ปจฺฉิมปาฏิปททิวสโต ปฏฺฐาย ยาว อาสาฬฺหปุณฺณมา อยเมโก อฑฺฒมาโส ปริเยสนกรณนิวาสนานํ ติณฺณํปิ เขตฺตํ ฯ เอตสฺมึ หิ อนฺตเร อลทฺธํ ปริเยสิตุํ ลทฺธํ กาตุํ จ นิวาเสตุํ จ วฏฺฏติ อธิฏฺฐาตุํเยว น วฏฺฏติ ฯ อาสาฬฺหปุณฺณมาสิยา ปจฺฉิมปาฏิปททิวสโต ปฏฺฐาย ยาว กตฺติกปุณฺณมา อิเม จตฺตาโร มาสา ปริเยสนกรณนิวาสนอธิฏฺฐานานํ จตุนฺนํปิ เขตฺตํ ฯ เอตสฺมึ หิ อนฺตเร อลทฺธํ ปริเยสิตุํ ลทฺธํ วา กาตุํ นิวาเสตุํ อธิฏฺฐาตุญฺจ วฏฺฏติ ฯ อิทํ ตาว จตุพฺพิธํ เขตฺตํ เวทิตพฺพํ ฯ กตฺติกปุณฺณมาสิยา ปน ปจฺฉิมปาฏิปททิวสโต ปฏฺฐาย ยาว เขฏฺฐมูลปุณฺณมา อิเม สตฺตมาสา ปิฏฺฐิสมโย นาม ฯ เอตสฺมึ หิ อนฺตเร กาโล วสฺสิกสาฏิกายาติ อาทินา นเยน สตุปฺปาทํ กตฺวา อญฺญาตกอปฺปวาริตฏฺฐานโต วสฺสิกสาฏิกจีวรํ นิปฺผาเทนฺตสฺส อิมินา สิกฺขาปเทน นิสฺสคฺคิยํ ปาจิตฺติยํ เทถ เม วสฺสิกสาฏิกจีวรนฺติ อาทินา นเยน วิญฺญตฺตึ กตฺวา นิปฺผาเทนฺตสฺส อญฺญาตกวิญฺญตฺติสิกฺขาปเทน นิสฺสคฺคิยํ ปาจิตฺติยํ ฯ วุตฺตนเยเนว สตุปฺปาทํ กตฺวา ญาตกปริวาริตฏฺฐานโต นิปฺผาเทนฺตสฺส อิมินาว สิกฺขาปเทน นิสฺสคฺคิยํ ปาจิตฺติยํ วิญฺญตฺตึ กตฺวา นิปฺผาเทนฺตสฺส อญฺญาตกวิญฺญตฺติสิกฺขาปเทน อนาปตฺติ ฯ วุตฺตํ เหตํ ปริวาเร