สํวิภชิตพฺพนฺติ สเจ ตโย ปตฺตปูรา คหิตา เอกํ อตฺตโน ฐเปตฺวา เทฺว ปตฺตปูรา ภิกฺขุสงฺฆสฺส ทาตพฺพา ฯ สเจ เทฺว คหิตา เอกํ อตฺตโน ฐเปตฺวา เอโก สงฺฆสฺส ทาตพฺโพ ฯ ยถามิตฺตํ ปน ทาตุํ น ลพฺภติ ฯ เยน เอโก คหิโต น เตน กิญฺจิ อกามา ทาตพฺพํ ยถารุจึ กาตพฺพํ ฯ {๒๓๕} คมเน ปฏิปฺปสฺสทฺเธติ อนฺตรามคฺเค อุปทฺทวํ วา ทิสฺวา อนตฺถิกตาย วา มยํ อิทานิ น เปสิสฺสาม น คมิสฺสามาติ เอวํ คมเน ปฏิปฺปสฺสทฺเธ อุปจฺฉินฺเน ฯ ญาตกานํ ปวาริตานนฺติ เอเตสํ พหุํปิ เทนฺตานํ ปฏิคฺคณฺหนฺตสฺส อนาปตฺติ ฯ อฏฺฐกถาสุ ปน เตสํปิ ปาเถยฺยปหิณตฺถาย ปฏิยตฺตโต ปมาณเมว วฏฺฏตีติ วุตฺตํ ฯ เสสํ อุตฺตานเมว ฯ ฉสฺสมุฏฺฐานํ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ

กาณมาตาสิกฺขาปทํ จตุตฺถํ ฯ