ปโลภสูตร

TIPITAKA Volume 20 : PALI ROMAN Sutta Pitaka Vol 12 : Sutta. Aṅ. (1): eka-duka-tikanipātā

[496] 57 Athakho aññataro brāhmaṇamahāsālo yena bhagavā tenupasaṅkami .pe. ekamantaṃ nisinno kho so brāhmaṇamahāsālo bhagavantaṃ etadavoca sutammetaṃ bho gotama pubbakānaṃ brāhmaṇānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ pubbassudaṃ ayaṃ loko avīci maññe phuṭo hoti 1- manussehi kukkuṭasampātikā gāmanigamajanapadarājadhāniyoti ko nu kho bho gotama hetu ko paccayo yenetarahi manussānaṃ khayo hoti tanuttaṃ paññāyati gāmāpi agāmā honti nigamāpi anigamā honti nagarāpi anagarā honti janapadāpi ajanapadā hontīti. {496.1} Etarahi brāhmaṇa manussā adhammarāgarattā visamalobhābhibhūtā micchādhammaparetā te adhammarāgarattā visamalobhābhibhūtā micchādhammaparetā tiṇhāni satthāni gahetvā aññamaññassa 2- jīvitā voropenti tena bahū manussā kālaṃ karonti ayaṃpi @Footnote: 1 Po. Ma. Yu. ahosi. 2 Ma. aññamaññaṃ. Kho brāhmaṇa hetu ayaṃ paccayo yenetarahi manussānaṃ khayo hoti tanuttaṃ paññāyati gāmāpi agāmā honti nigamāpi anigamā honti nagarāpi anagarā honti janapadāpi ajanapadā honti. {496.2} Puna ca paraṃ brāhmaṇa etarahi manussā adhammarāgarattā visamalobhābhibhūtā micchādhammaparetā tesaṃ adhammarāgarattānaṃ visamalobhābhibhūtānaṃ micchādhammaparetānaṃ devo na sammā dhāraṃ anuppavecchati tena dubbhikkhaṃ hoti dussassaṃ setaṭṭhikaṃ salākāvuttaṃ tena bahū manussā kālaṃ karonti ayaṃpi kho brāhmaṇa hetu ayaṃ paccayo yenetarahi manussānaṃ khayo hoti tanuttaṃ paññāyati gāmāpi agāmā honti nigamāpi anigamā honti nagarāpi anagarā honti janapadāpi ajanapadā honti. {496.3} Puna ca paraṃ brāhmaṇa etarahi manussā adhammarāgarattā visamalobhābhibhūtā micchādhammaparetā tesaṃ adhammarāgarattānaṃ visamalobhābhibhūtānaṃ micchādhammaparetānaṃ yakkhā vāḷe amanusse ossajjanti tena bahū manussā kālaṃ karonti ayaṃpi kho brāhmaṇa hetu ayaṃ paccayo yenetarahi manussānaṃ khayo hoti tanuttaṃ paññāyati gāmāpi agamā honti nigamāpi anigamā honti nagarāpi anagarā honti janapadāpi ajanapadā hontīti . Abhikkantaṃ bho gotama .pe. upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatanti.