ฉันนสูตร

๘. ๓. อานนฺทวคฺค

๑. ฉนฺนสุตฺตวณฺณนา

ตติยสฺส ปฐเม ฉนฺโนติ เอวํนามโก ปฏิจฺฉนฺนปริพฺพาชโก. ๑- ตุมฺเหปิ อาวุโสติ อาวุโส ยถา มยํ ราคาทีนํ ปหานํ ปญฺญาเปม, กึ เอวํ ตุเมฺหปิ ปญฺญาเปถาติ ปุจฺฉติ. ตโต เถโร "อยํ ปริพฺพาชโก อเมฺห ราคาทีนํ ปหานํ ปญฺญาเปมาติ วทติ, นตฺถิ ปเนตํ พาหิรสมเยนา"ติ ตํ ปฏิกฺขิปนฺโต มยํ โข อาวุโสติอาทิมาห. ตตฺถ โขติ อวธารณตฺเถ นิปาโต, มยเมว ปญฺญาเปมาติ อตฺโถ. ตโต ปริพฺพาชโก จินฺเตสิ "อยํ เถโร พาหิรกสมยํ ลุญฺจิตฺวา หรนฺโต `มยเมวา'ติ อาห, กินฺนุ โข อาทีนวํ ทิสฺวา เอเต เอเตสํ ปหานํ ปญฺญาเปนฺตี"ติ. อถ เถรํ ปุจฺฉนฺโต กิมฺปน ตุเมฺหติอาทิมาห. เถโร ตสฺส พฺยากโรนฺโต รตฺโต โข อาวุโสติอาทิมาห. ตตฺถ อตฺตตฺถนฺติ ทิฏฺฐธมฺมิกสมฺปรายิกโลกิยโลกุตฺตรํ อตฺตโน อตฺถํ. ปรตฺถอุภยตฺเถสุปิ เอเสว นโย.

อนฺธกรโณติอาทีสุ ยสฺส ราโค อุปฺปชฺชติ, ตํ ยถาภูตทสฺสนนิวารเณน อนฺธํ กโรตีติ อนฺธกรโณ. ปญฺญาจกฺขุํ น กโรตีติ อจกฺขุกรโณ. ญาณํ น กโรตีติ อญฺญาณกรโณ. กมฺมสฺสกตปญฺญา ฌานปญฺญา วิปสฺสนาปญฺญาติ อิมา ติสฺโส ปญฺญา อปฺปวตฺติกรเณน นิโรเธตีติ ปญฺญานิโรธิโก. อนิฏฺฐผลทายกตฺตา ทุกฺขสงฺขาตวิฆาตสฺเสว ปกฺเข วตฺตตีติ วิฆาตปกฺขิโก. กิเลสนิพฺพานํ น สํวตฺเตตีติ อนิพฺพานสํวตฺตนิโก. อลญฺจ ปน อาวุโส อานนฺท อปฺปมาทายาติ อาวุโส อานนฺท สเจ เอวรูปาปิ ปฏิปทา อตฺถิ, อลํ ตุมฺหากํ อปฺปมาทาย ยุตฺตํ อนุจฺฉวิกํ, อปฺปมาทํ กโรถาติ ๒- เถรสฺส วจนํ อนุโมทิตฺวา ปกฺกามิ. อิมสฺมึ สุตฺเต อริยมคฺโค โลกุตฺตรมิสฺสโก กถิโต. เสสํ สพฺพตฺถ ๓- อุตฺตานตฺถเมวาติ.

@เชิงอรรถ: ๑ ฉ.ม. ฉนฺนปริพฺพาชโก ๒ ฉ.ม. กโรถ อาวุโสติ ๓ ฉ.ม. เสสเมตฺถ