อาชีวกสูตร

2. Ājīvakasuttavaṇṇanā

Dutiye tenahi gahapatīti thero kira cintesi "ayaṃ idhāgacchanto na aññātukāmo hutvā āgami, 1- pariggaṇhanatthaṃ pana āgato. Iminā pucchitaṃ pañhaṃ imināva kathāpessāmī"ti. Iti taṃyeva kathaṃ kathāpetukāmo tenahītiādimāha. Tattha tenahīti kāraṇāpadeso. Yasmā tvaṃ evaṃ pucchasi, tasmā taññevettha paṭipucchāmīti. Kesannoti katamesaṃ nu. Sadhammukkaṃsanāti attano laddhiyā ukkhipitvā ṭhapanā. Paradhammāpasādanāti paresaṃ laddhiyā ghaṭṭanā vambhanā avakkhipanā. Āyataneva 2- dhammadesanāti kāraṇasmiṃyeva dhammadesanā. Attho ca vuttoti mayā pucchitapañhassa 3- attho ca pakāsito. Attā ca anupanītoti amhe evarūpāti evaṃ attā ca na upanīto. Nupanītotipi 4- pāṭho.