อัจจายิกสูตร

93 Tīṇīmāni bhikkhave kassakassa gahapatissa accāyikāni karaṇīyāni katamāni tīṇi idha bhikkhave kassako gahapati sīghasīghaṃ khettaṃ sukaṭṭhaṃ karoti sumatikataṃ sīghasīghaṃ khettaṃ sukaṭṭhaṃ karitvā sumatikataṃ sīghasīghaṃ bījāni patiṭṭhāpeti sīghasīghaṃ bījāni patiṭṭhāpetvā sīghasīghaṃ udakaṃ abhinetipi apanetipi imāni kho bhikkhave tīṇi kassakassa gahapatissa accāyikāni karaṇīyāni . tassa kho taṃ bhikkhave kassakassa gahapatissa natthi sā iddhi vā ānubhāvo vā ajjeva me dhaññāni jāyantu sveva gabbhiniyo 1- hontu uttarasve pacantūti athakho bhikkhave hoti so samayo yaṃ tassa kassakassa gahapatissa tāni dhaññāni utupariṇāmīni jāyantipi gabbhinīpi honti pacantipi. {532.1} Evameva kho bhikkhave tīṇīmāni bhikkhussa accāyikāni karaṇīyāni katamāni tīṇi adhisīlasikkhāsamādānaṃ adhicittasikkhāsamādānaṃ adhipaññāsikkhāsamādānaṃ imāni kho bhikkhave tīṇi bhikkhussa accāyikāni karaṇīyāni . tassa kho taṃ bhikkhave bhikkhuno natthi sā iddhi vā ānubhāvo vā ajjeva me anupādāya āsavehi cittaṃ vimuccatu sve vā uttarasve vāti athakho bhikkhave hoti so samayo yaṃ tassa bhikkhuno anupādāya āsavehi cittaṃ vimuccati . tasmā tiha bhikkhave evaṃ sikkhitabbaṃ tibbo no chando bhavissati adhisīlasikkhāsamādāne tibbo no 2- chando bhavissati @Footnote: 1 Po. Ma. gabbhīni. 2 Po. Ma. noti saddo natki. ito paraṃ īdisameva. Adhicittasikkhāsamādāne tibbo no chando bhavissati adhipaññāsikkhāsamādāneti evañhi vo bhikkhave sikkhitabbanti.