โรณสูตร

5. Ruṇṇasuttavaṇṇanā

Pañcamaṃ atthuppattiyā nikkhittaṃ. Katarāya atthuppattiyā? chabbaggiyānaṃ anācāre. Te kira gāyantā naccantā hasantā vicariṃsu. Bhikkhū dasabalassa ārocayiṃsu. Satthā te pakkosāpetvā tesaṃ ovādatthāya idaṃ suttaṃ ārabhi. Tattha ruṇṇanti roditaṃ. Ummattakanti ummattakakiriyā. Komārikanti 2- kumārakehi kattabbakiccaṃ. Dantavidaṃsakahasitanti 3- dante dassetvā pāṇiṃ paharantānaṃ mahāsaddena hasitaṃ. Setughāto gīteti gīte vo paccayaghāto hotu, sahetukaṃ gītaṃ pajahathāti dīpeti. Naccepi eseva nayo. Alanti yuttaṃ. Dhammappamoditānaṃ satanti ettha dhammo vuccati kāraṇaṃ, kenacideva kāraṇena pamuditānaṃ sataṃ. 4- Sitaṃ sitamattāyāti tasmiṃ sitakāraṇe sati yaṃ sitaṃ karotha, taṃ vo sitamattāya aggadante 5- dassetvā pahaṭṭhā kāramattadassanāyayeva yuttanti vuttaṃ hoti.