วรรคที่ ๑

[๑๔๖] เอตทคฺคํ ภิกฺขเว มม สาวกานํ ภิกฺขูนํ รตฺตญฺญูนํ ยทิทํ อญฺญาโกณฺฑญฺโญ ๑ ฯ มหาปญฺญานํ ยทิทํ สารีปุตฺโต ฯ อิทฺธิมนฺตานํ ยทิทํ มหาโมคฺคลฺลาโน ฯ ธูตวาทานํ ๒ ยทิทํ มหากสฺสโป ฯ ทิพฺพจกฺขุกานํ ยทิทํ อนุรุทฺโธ ฯ อุจฺจากุลิกานํ ยทิทํ ภทฺทิโย กาฬิโคธายปุตฺโต ฯ มญฺชุสฺสรานํ ยทิทํ ลกุณฺฏกภทฺทิโย ฯ สีหนาทิกานํ ยทิทํ ปิณฺโฑลภารทฺวาโช ฯ ธมฺมกถิกานํ ยทิทํ ปุณฺโณ มนฺตานิปุตฺโต ฯ สงฺขิตฺเตน ภาสิตสฺส วิตฺถาเรน อตฺถํ วิภชนฺตานํ ยทิทํ มหากจฺจาโนติ ฯ วคฺโค ปฐโม ฯ