ยถา ปุเร ตถา ปจฺฉาติ ยถา ปฐมํ ตีสุ สิกฺขาสุ สิกฺขติ, ปจฺฉา ตเถว สิกฺขตีติ อตฺโถ. ทุติยปเทปิ เอเสว นโย. ยถา อโธ ตถา อุทฺธนฺติ ยถา เหฏฺฐิมกายํ อสุภวเสน ปสฺสติ, อุปริมกายํปิ ตเถว ปสฺสติ. ๑- ทุติยปเทปิ เอเสว นโย. ยถา ทิวา ตถา รตฺตินฺติ ยถา ทิวา ติสฺโสปิ ๒- สิกฺขา สิกฺขติ, รตฺตึปิ ตเถว สิกฺขตีติ อตฺโถ. อภิภุยฺย ทิสา สพฺพาติ สพฺพา ทิสา อารมฺมเณ ๓- อภิภวิตฺวา. อปฺปมาณสมาธินาติ อรหตฺตมคฺคสมาธินา.

เสกฺขนฺติ สิกฺขมานํ ๔- สกรณียํ. ปฏิปทนฺติ ปฏิปนฺนกํ. สํสุทฺธจารินนฺติ ๕- สํสุทฺธจรณํ ปริสุทฺธสีลํ. สมฺพุทฺธนฺติ จตุสจฺจพุทฺธํ. ธีรํ ๖- ปฏิปทนฺตคุนฺติ ขนฺธธีรธาตุธีรอายตนธีรวเสน ธีรํ ๗- ธิติสมฺปนฺนํ วตฺตปฏิปตฺติยา ๘- อนฺตคตํ. วิญฺญาณสฺสาติ จริมกวิญฺญาณสฺส. ตณฺหกฺขยวิมุตฺติโนติ ตณฺหกฺขยวิมุตฺติสงฺขาตาย อรหตฺตผลวิมุตฺติยา สมนฺนาคตสฺส. ปชฺโชตสฺเสว นิพฺพานนฺติ ปทีปนิพฺพานํ วิย. วิโมกฺโข โหติ เจตโสติ จิตฺตสฺส วิมุตฺติ วิมุจฺจนา อปฺปวตฺติภาโว โหติ. ตณฺหกฺขยวิมุตฺติโน หิ ขีณาสวสฺส จริมกวิญฺญาณนิโรเธน ปรินิพฺพานํ วิย เจตโส วิโมกฺโข โหติ, คตฏฺฐานํ น ปญฺญายติ, อปณฺณตฺติกภาวูปคโมเยว โหตีติ อตฺโถ.