3. Gotamakacetiyasuttavaṇṇanā

[126] Tatiye gotamake cetiyeti gotamakayakkhassa bhavane. Tathāgato hi paṭhamabodhiyaṃ vīsati vassāni kadāci cāpāle cetiye, kadāci sārandade kadāci bahuputte, kadāci sattambeti evaṃ yebhuyyena devālayesuyeva vihāsi. Imasmiṃ pana kāle vesāliṃ upanissāya gotamakassa yakkhassa bhavanaṭṭhāne vihāsi. Tena vuttaṃ "gotamake cetiye"ti. Etadavocāti etaṃ "abhiññāyāhan"tiādikaṃ suttantaṃ avoca.

Idañca pana bhagavātā suttaṃ atthuppattiyaṃ vuttanti veditabbaṃ. Kataraṃ atthuppattiyanti? mūlapariyāyaatthuppattiyaṃ. Sambahulā kira brāhmaṇapabbajitā attanā uggahitabuddhavacanaṃ nissāya jānanamadaṃ uppādetvā dhammassavanaggaṃ na gacchanti "sammāsambuddho kathento amhehi ñātameva kathessati, no aññātan"ti. Bhikkhū tathāgatassa ārocesuṃ. Satthā te bhikkhū pakkosāpetvā mukhapaṭiññaṃ gahetvā mūlapariyāyaṃ desesi. Te bhikkhū desanāya neva āgataṭṭhānaṃ na gataṭṭhānaṃ addasaṃsu. Apassantā "sammāsambuddho `mayhaṃ kathā niyyātī'ti mukhasampattameva kathetī"ti cintayiṃsu. Satthā tesaṃ manaṃ jānitvā imaṃ suttantaṃ ārabhi.

Tattha abhiññāyāti "ime pañcakkhandhā dvādasāyatanāni aṭṭhārasa dhātuyo bāvīsatindriyāni cattāri saccāni nava hetū satta phassā satta vedanā satta