4. Nigaṇṭhasuttavaṇṇanā

[75] Catutthe kūṭāgārasālāyanti dve kaṇṇikā gahetvā haṃsavaṭṭakacchadanena katāya gandhakuṭiyā. Aparisesaṃ ñāṇadassanaṃ paṭijānātīti appamattakaṃpi asesetvā sabbaṃ ñāṇadassanaṃ paṭijānāti. Sasataṃ samitanti sabbakālaṃ nirantaraṃ. Ñāṇadassanaṃ paccupaṭṭhitanti sabbaññutañāṇaṃ mayhaṃ upaṭṭhitanti dasseti. Purāṇānaṃ kammānanti āyūhitakammānaṃ. Tāpasā byantībhāvanti dukkaratapena vigatantīkaraṇaṃ. Navānaṃ kammānanti idāni āyūhitabbakammānaṃ. Akaraṇāti anāyūhanena. Setughātanti padaghātaṃ paccayaghātaṃ katheti. Kammakkhayā dukkhakkhayoti kammavaṭṭakkhayena dukkhavaṭṭakkhayo. Dukkhakkhayā vedanākkhayoti dukkhavaṭṭakkhayena vedanākkhayo. Dukkhavaṭṭasmiṃ hi khīṇe vedanāvaṭṭaṃpi khīṇameva hoti. Vedanākkhayā sabbaṃ dukkhaṃ nijjiṇṇaṃ bhavissatīti vedanākkhayena pana sakalavaṭṭadukkhaṃ nijjiṇṇameva bhavissati. Sandiṭṭhikāyāti sāmaṃ pekkhitabbāya paccakkhāya. Nijjarāya visuddhiyāti kilese jīraṇakapaṭipadāya kilese vā nijjīraṇato nijjarāya sattānaṃ vā visuddhipāpanato visuddhiyāti nijjarāvisuddhiyā. Samatikkamo hotīti sakalassa vaṭṭadukkhassa samatikkamo hoti. Idha bhante bhagavā kimāhāti bhante bhagavā imāya paṭipattiyā kimāha, kiṃ etaṃyeva kilesanijjīraṇakapaṭipadaṃ paññāpeti, udāhu aññanti pucchati.

Jānatāti anāvaraṇañāṇena jānantena. Passatāti samantacakkhunā passantena. Visuddhiyāti visuddhisampāpanatthāya. Samatikkamāyāti samatikkamanatthāya. Atthaṅgamāyāti atthaṅgamanatthāya. Ñāyassa adhigamāyāti saha vipassanāya maggassa adhigamanatthāya. Nibbānassa sacchikiriyāyāti apaccayanibbānassa sacchikaraṇatthāya. Navañca kammaṃ na karotīti navaṃ kammaṃ nāyūhati. Purāṇaṃ ca kammanti pubbe āyūhitakammaṃ. Phussa phussa byantīkarotīti phusitvā phusitvā vigataṃ karoti, vipākaphassaṃ phusitvā phusitvā