@3 cha.Ma.,i. devakulesuyeva 4 Sī.,i. vasanaṭṭhāne

@5 cha.Ma.,i. katraatthuppattiyanti 6 Ma.mū. 12/1/1 mūlapariyāyasutta Cetanā satta saññā satta cittānī"ti jānitvā paṭivijjhitvā paccakkhaṃ katvā, tathā "ime cattāro satipaṭṭhānā"tiādinā nayena te te dhamme jānitvā paṭivijjhitvā paccakkhameva katvāti attho. Sanidānanti sapaccayameva katvā kathemi, no apaccayaṃ. Sappāṭihāriyanti paccanīkapaṭiharaṇena sappāṭihāriyameva katvā kathemi, no appāṭihāriyaṃ. Alañca pana voti yuttañca pana tumhākaṃ. Tuṭṭhiyāti "sammāsambuddho bhagavā, svākkhāto dhammo, supaṭipanno saṃgho"ti tīṇi ratanāni guṇato anussarantānaṃ tumhākaṃ yuttameva tuṭṭhiṃ kātunti attho. Sesapadadvayepi eseva nayo.

Akampitthāti chahi ākārehi akampittha. Evarūpo hi paṭhavīkampo bodhimaṇḍepi ahosi. Bodhisatte kira dakkhiṇadisābhāgena bodhimaṇḍaṃ abhiruḷhe dakkhiṇabhāgo heṭṭhā avīciṃ pāpuṇanto viya ahosi, uttarabhāgo uggantvā bhavaggaṃ abhihananto viya. Pacchimadisaṃ gate pacchimabhāgo heṭṭhā avīciṃ pāpuṇanto viya ahosi, pācīnabhāgo uggantvā bhavaggaṃ abhihananto viya ahosi. Uttaradisaṃ gate uttarabhāgo heṭṭhā avīciṃ pāpuṇanto viya, dakkhiṇadisābhāgo uggantvā bhavaggaṃ abhihananto viya. Pācīnadisaṃ gate pācīnadisābhāgo heṭṭhā avīciṃ pāpuṇanto viya, pacchimabhāgo uggantvā bhavaggaṃ abhihananto viya. Bodhirukkhopi sakiṃ heṭṭhā avīciṃ pāpuṇanto viya, sakiṃ uggantvā bhavaggaṃ abhihananto viya. Tasmiṃpi divase evaṃ chahi ākārehi cakkavāḷasahasse mahāpaṭhavī akampittha.