@soṇakoḷivisavatthu 14 aṅ.catukka. 21/243/267 saṃghabhedakasutta

@15 saṃ.kha. 17/57/50 sattaṭṭhānasutta 16 cha.Ma. idha pana

Kappasaddo panāyaṃ abhisaddahanavohārakālapaññatticchedanavikappalesasamantabhāvādi- anekattho. Tathā hissa "okappaniyametaṃ bhoto gotamassa, yathātaṃ arahato sammāsambuddhassā"ti evamādīsu abhisaddahanaṃ attho. "anujānāmi bhikkhave pañcahi samaṇakappehi phalaṃ paribhuñjitun"ti evamādīsu vohāro. "yena sudaṃ niccakappaṃ viharāmī"ti evamādīsu kālo. "iccāyasmā kappo"ti evamādīsu paññatti. "alaṅkato kappitakesamassū"ti evamādīsu chedanaṃ. "kappati dvaṅgulakappo"ti evamādīsu vikapPo. "atthi kappo nipajjitun"ti evamādīsu leso. "kevalakappaṃ jetavanaṃ obhāsetvā"ti evamādīsu samantabhāvo. Idha panassa samantabhāvo atthoti adhippeto. Tasmā kevalakappaṃ jetavananti ettha anavasesaṃ samantato jetavananti attho.

Obhāsetvāti ābhāya pharitvā. Vālikāyāti saṇhavālukāyaṃ. Na saṇṭhāti na patiṭṭhāti. Oḷārikanti brahmadevatāya hi paṭhaviyaṃ patiṭṭhānakāle attabhāvo oḷāriko māpetuṃ vaṭṭati paṭhavī vā, tasmā evamāha. Dhammāti iminā pubbe uggahitabuddhavacanaṃ dasseti. Nappavattino ahesunti sajjhāyamūḷhakavācāya parihīnā ahesuṃ. Appaṭivāṇoti anivatto anukkaṇṭhito.