อัจฉริยสูตร ที่ ๒

TIPITAKA Volume 21 : PALI ROMAN Sutta Pitaka Vol 13 : Sutta. Aṅ. (2): catukkanipāto

[128] Tathāgatassa bhikkhave arahato sammāsambuddhassa pātubhāvā cattāro acchariyā abbhutadhammā pātubhavanti katame cattāro ālayārāmā bhikkhave pajā ālayaratā ālayasammuditā sā tathāgatena anālaye dhamme desiyamāne sussuti 1- sotaṃ odahati aññācittaṃ upaṭṭhapeti @Footnote: 1 Po. Ma. sussūsati. Yu. sussūyati. ito paraṃ īdisameva. Tathāgatassa bhikkhave arahato sammāsambuddhassa pātubhāvā ayaṃ paṭhamo acchariyo abbhutadhammo pātubhavati. {128.1} Mānārāmā bhikkhave pajā mānaratā mānasammuditā sā tathāgatena mānavinaye dhamme desiyamāne sussuti sotaṃ odahati aññācittaṃ upaṭṭhapeti tathāgatassa bhikkhave arahato sammāsambuddhassa pātubhāvā ayaṃ dutiyo acchariyo abbhutadhammo pātubhavati. {128.2} Anupasamārāmā bhikkhave pajā anupasamaratā anupasamasammuditā sā tathāgatena opasamike dhamme desiyamāne sussuti sotaṃ odahati aññācittaṃ upaṭṭhapeti tathāgatassa bhikkhave arahato sammāsambuddhassa pātubhāvā ayaṃ tatiyo acchariyo abbhutadhammo pātubhavati. {128.3} Avijjāgatā bhikkhave pajā andhabhūtā pariyonaddhā sā tathāgatena avijjāvinaye dhamme desiyamāne sussuti sotaṃ odahati aññācittaṃ upaṭṭhapeti tathāgatassa bhikkhave arahato sammāsambuddhassa pātubhāvā ayaṃ catuttho acchariyo abbhutadhammo pātubhavati . Tathāgatassa bhikkhave arahato sammāsambuddhassa pātubhāvā ime cattāro acchariyā abbhutadhammā pātubhavantīti.