จักกสูตร

๔. จกฺกวคฺค

๑. จกฺกสุตฺตวณฺณนา

จตุตฺถสฺส ปฐเม จกฺกานีติ สมฺปตฺติโย. จตุจกฺกํ วตฺตตีติ จตฺตาริ สมฺปตฺติจกฺกานิ วตฺตนฺติ ฆฏฺฏิยนฺติเยวาติ อตฺโถ. ปฏิรูปเทสวาโสติ ยตฺถ จตสฺโส ปริสา สนฺทสฺสนฺติ, เอวรูเป อนุจฺฉวิเก เทเส วาโส. สปฺปุริสูปสฺสโยติ ๑- พุทฺธาทีนํ สปฺปุริสานํ อุปสฺสยนํ ภชนํ. ๒- น ราชานํ. อตฺตสมฺมาปณิธีติ อตฺตโน สมฺมาฐปนํ. สเจ ปุพฺเพ อสฺสทฺธาทีหิ สมนฺนาคโต โหติ, ตานิ ปหาย สทฺธาทีสุ ปติฏฺฐาปนํ. ปุพฺเพ จ กตปุญฺญตาติ ปุพฺเพ อุปจิตกุสลตา. อิทเมว เจตฺถ ปมาณํ. เยน หิ ญาณสมฺปยุตฺตจิตฺเตน กุสลกมฺมํ กตํ โหติ, ตเทว กุสลํ ตํ ปุริสํ ปฏิรูปเทเส อุปเนติ, สปฺปุริเส ภชาเปติ, โสเอว จ ปุคฺคโล อตฺตานํ สมฺมา ฐเปติ. ปุญฺญกโตติ กตปุญฺโญ. สุขญฺเจตํ อธิวตฺตตีติ สุขญฺจ เอตํ ปุคฺคลํ อธิวตฺตติ, อวตฺถรตีติ อตฺโถ.