๑. กิมพิลสูตร

5. Pañcamapaṇṇāsaka

21. 1. Kimbilavagga

1. Kimbilasuttavaṇṇanā

Pañcamassa paṭhame kimbilāyanti 1- evaṃnāmake nagare. Niculavaneti 2- muccalindavane. Etadavocāti ayaṃ kira thero tasmiṃyeva nagare seṭṭhiputto satthu santike pabbajitvā pubbenivāsañāṇaṃ paṭilabhi, so attanā nivuṭṭhaṃ khandhasantānaṃ anussaranto kassapadasabalassa sāsanosakkanakāle pabbajitvā catūsu parisāsu sāsane agāravaṃ karontīsu nisseṇiṃ bandhitvā pabbataṃ āruyha tattha samaṇadhammaṃ katvā attano nivuṭṭhabhāvaṃ 3- addasa. So "satthāraṃ upasaṅkamitvā taṃ kāraṇaṃ pucchissāmī"ti taṃ 4- "ko nu kho bhante"tiādivacanaṃ avoca.

Satthari agāravā viharanti appatissāti satthari gāravañceva jeṭṭhakabhāvañca anupaṭṭhapetvā viharanti. Sesesupi eseva nayo. Tattha cetiyaṅgaṇādīsu chattaṃ dhāretvā upāhanā āruyha vicaranto nānappakārañca niratthakakathaṃ kathento satthari agāravo viharati nāma. Dhammassavanagge pana nisīditvā niddāyanto ceva nānappakārañca niratthakakathaṃ kathento dhamme agāravo viharati nāma. Saṃghamajjhe bāhāvikkhepakaṃ nānatthakathaṃ kathento theranavamajjhimesu ca cittīkāraṃ akaronto saṃghe agāravo viharati nāma. Sikkhaṃ aparipūrento sikkhāya agāravo viharati nāma. Aññamaññaṃ kalahabhaṇḍanādīni karonto aññamaññaṃ agāravo viharati nāma. Dutiyaṃ uttānatthameva.