มิตตสูตร

67 So vata bhikkhave bhikkhu pāpamitto pāpasahāyo pāpasampavaṅko pāpamitte sevamāno bhajamāno payirupāsamāno tesañca diṭṭhānugatiṃ āpajjamāno abhisamācārikaṃ dhammaṃ paripūressatīti netaṃ ṭhānaṃ vijjati abhisamācārikaṃ dhammaṃ aparipūretvā sekhadhammaṃ paripūressatīti netaṃ ṭhānaṃ vijjati sekhadhammaṃ aparipūretvā sīlāni paripūressatīti netaṃ ṭhānaṃ vijjati sīlāni aparipūretvā kāmarāgaṃ vā rūparāgaṃ vā arūparāgaṃ vā pajahissatīti netaṃ ṭhānaṃ vijjati so vata bhikkhave bhikkhu kalyāṇamitto kalyāṇasahāyo kalyāṇasampavaṅko kalyāṇamitte sevamāno bhajamāno payirupāsamāno tesañca diṭṭhānugatiṃ āpajjamāno abhisamācārikaṃ dhammaṃ paripūressatīti ṭhānametaṃ vijjati abhisamācārikaṃ dhammaṃ paripūretvā sekkhadhammaṃ paripūressatīti ṭhānametaṃ vijjati sekhadhammaṃ paripūretvā sīlāni paripūressatīti ṭhānametaṃ vijjati sīlāni paripūretvā kāmarāgaṃ vā rūparāgaṃ vā arūparāgaṃ vā pajahissatīti ṭhānametaṃ vijjatīti.