๔. สีหสูตร

๔. สีหเสนาปติสุตฺตวณฺณนา

จตุตฺเถ สนฺทิฏฺฐิกนฺติ สามํ ปสฺสิตพฺพกํ. ทายโกติ ทานสูโร น โส ๑- สทฺธามตฺตเกเนว ติฏฺฐติ, ปริจฺจชิตุํปิ สกฺโกตีติ อตฺโถ. ทานปตีติ ยํ ทานํ เทติ, ตสฺส ปติ หุตฺวา เทติ, น ทาโส, น สหาโย. โย หิ อตฺตนา มธุรํ ภุญฺชติ, ปเรสํ อมธุรํ เทติ, โส ทานสงฺขาตสฺส เทยฺยธมฺมสฺส ทาโส หุตฺวา เทติ. โย ยํ อตฺตนา ภุญฺชติ, ตเทว เทติ, โส สหาโย หุตฺวา เทติ. โย ปน อตฺตนา เยน เกนจิ ยาเปติ, ปเรสํ มธุรํ เทติ, โส ปติ เชฏฺฐโก สามี หุตฺวา เทติ. ตาทิสํ สนฺธาย วุตฺตํ "ทานปตี"ติ.

อมงฺกุภูโตติ น นิตฺเตชภูโต. วิสารโทติ ญาณโสมนสฺสปฺปตฺโต. สหพฺยคตาติ ๒- สหภาวํ เอกีภาวํ คตา. กตาวกาสาติ ๓- เยน กมฺเมน ตตฺถ อวกาโส ๔- โหติ, ตสฺส กตตฺตา กตาวกาสา. ๕- ตํ ปน ยสฺมา กุสลเมว โหติ, ตสฺมา กตกุสลาติ วุตฺตํ. โมทเรติ โมทนฺติ ปโมทนฺติ. อสิตสฺสาติ อนิสฺสิตสฺส ตถาคตสฺส. ตาทิโนติ ตาทิลกฺขณปฺปตฺตสฺส.