สุตวาสูตร

TIPITAKA Volume 23 : PALI ROMAN Sutta Pitaka Vol 15 : Sutta. Aṅ. (4): sattaka-aṭṭhaka-navakanipātā

[211] 7 Ekaṃ samayaṃ bhagavā rājagahe viharati gijjhakūṭe pabbate . athakho sutavā paribbājako yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi ekamantaṃ nisinno kho sutavā paribbājako bhagavantaṃ etadavoca ekamidāhaṃ bhante samayaṃ bhagavā idheva rājagahe viharāmi giribbaje tatra kho me bhante bhagavato sammukhā sutaṃ sammukhā paṭiggahitaṃ yo so sutava 1- bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaññojano sammadaññāvimutto abhabbo so pañcaṭṭhānāni ajjhācarituṃ abhabbo khīṇāsavo bhikkhu sañcicca pāṇaṃ jīvitā voropetuṃ abhabbo khīṇāsavo bhikkhu adinnaṃ theyyasaṅkhātaṃ ādātuṃ abhabbo khīṇāsavo bhikkhu methunaṃ dhammaṃ paṭisevituṃ abhabbo khīṇāsavo bhikkhu sampajānamusā bhāsituṃ abhabbo khīṇāsavo bhikkhu sannidhikārakaṃ kāme paribhuñjituṃ seyyathāpi pubbe agāriyabhūtoti kacci metaṃ bhante bhagavato sussutaṃ suggahitaṃ sumanasikataṃ sūpadhāritanti. {211.1} Taggha te sutava etaṃ sussutaṃ suggahitaṃ sumanasikataṃ sūpadhāritaṃ pubbe cāhaṃ sutava etarahi ca evaṃ vadāmi yo so bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaññojano sammadaññāvimutto abhabbo so navaṭṭhānāni @Footnote: 1 Ma. sutavā. evamuparipi. Ajjhācarituṃ abhabbo khīṇāsavo bhikkhu sañcicca pāṇaṃ jīvitā voropetuṃ abhabbo khīṇāsavo bhikkhu adinnaṃ theyyasaṅkhātaṃ ādātuṃ abhabbo khīṇāsavo bhikkhu methunaṃ dhammaṃ paṭisevituṃ abhabbo khīṇāsavo bhikkhu sampajānamusā bhāsituṃ abhabbo khīṇāsavo bhikkhu sannidhikārakaṃ kāme paribhuñjituṃ seyyathāpi pubbe agāriyabhūto abhabbo khīṇāsavo bhikkhu chandāgatiṃ gantuṃ abhabbo khīṇāsavo bhikkhu dosāgatiṃ gantuṃ abhabbo khīṇāsavo bhikkhu mohāgatiṃ gantuṃ abhabbo khīṇāsavo bhikkhu bhayāgatiṃ gantuṃ pubbe cāhaṃ sutava etarahi ca evaṃ vadāmi yo so bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaññojano sammadaññāvimutto abhabbo so imāni navaṭṭhānāni ajjhācaritunti.