สอุปาทิเสสสูตร

๒. สอุปาทิเสสสุตฺตวณฺณนา

ทุติเย สอุปาทิเสสนฺติ สอุปาทานเสสํ. อนุปาทิเสสนฺติ อุปาทานเสส- รหิตํ นิคฺคหณํ. มตฺตโสการีติ ปมาณการี น ปริปูรการี. น ตาวายํ สาริปุตฺต ธมฺมปริยาโย ปฏิภาสีติ อปฺปฏิภาณํ นาม ภควโต นตฺถิ, น ตาวาหํ อิมํ ธมฺมปริยายํ กเถสฺสนฺติ อยํ ปเนตฺถ อตฺโถ. มายิมํ ธมฺมปริยายํ สุตฺวา ปมาทํ อาหรึสูติ "มยํ กิร จตูหิ อปาเยหิ มุตฺตา"ติ อุปริ อรหตฺตตฺถาย วิริยํ อกโรนฺตา มา ปมาทํ อาปชฺชึสุ. ปญฺหาธิปฺปาเยน ภาสิโตติ ตสฺส ๑- ปุจฺฉิตปญฺหสฺส สภาเคน กถิโตติ ทสฺเสติ. อิเมสํ ปน นวนฺนํ ปุคฺคลานํ ภเวสุ ฉนฺทราควิโนทนตฺถํ เอตเมว อตฺถุปฺปตฺตึ กตฺวา เสยฺยถาปิ ภิกฺขเว อปฺปมตฺตโกปิ คูโถ ทุคฺคนฺโธ โหติ, เอวเมว โข อหํ ภิกฺขเว อปฺปมตฺตกํปิ ภวํ น วณฺเณมิ อนฺตมโส อจฺฉราสงฺฆาตมตฺตมฺปี"ติ อิมํ สุตฺตนฺตํ ๒- อภาสิ. น เกวลญฺจ เอเตสํเยว นวนฺนํ ปุคฺคลานํ คติ น นิพทฺธา, เยสํ ปน กุลานํ ตีณิ สรณานิ ปญฺจ สีลานิ เอกํ สลากภตฺตํ เอกํ ปกฺขิกภตฺตํ เอกํ วสฺสาวาสิกํ เอกา โปกฺขรณี เอโก อาวาโส, เอวรูปานิ นิพทฺธปุญฺญานิ อตฺถิ, เตสํปิ คติ นิพทฺธา, โสตาปนฺนสทิสาเนว ตานิ กุลานิ.