เทวสูตร

๘. เทวาสุรสงฺคามสุตฺตวณฺณนา

อฏฺฐเม สมุปพฺยุโฬฺห อโหสีติ ปจฺจุปฏฺฐิโต อโหสิ. สงฺคาเมยฺยามาติ สงฺคามํ กเรยฺยาม ยุชฺเฌยฺยาม. อปสฺสึเสฺววาติ ๑- ปลายึสุเยว. อุตฺตราภิมุขาติ อุตฺตรามุขา หุตฺวา. อภิภยนฺเตวาติ ๒- อนุพนฺธนฺติเยว. ภีรุตฺตานคเตนาติ ภีรุตฺตานํ ภยนิวารณํ ปติฏฺฐานํ คเตน. ๓- อกรณียาติ ยุทฺเธน กิญฺจิ อกตฺตพฺพา. กสฺมา ปน เตสํ สงฺคาโม โหตีติ อสุรา หิ ปุพฺเพ ตาวตึสภวนวาสิโน ๔- เต จิตฺตปาตลิยา ปุปฺผนกาเล ทิพฺพปาริจฺฉตฺตกปุปฺผํ อนุสฺสรนฺติ. ตโต อุปฺปนฺนโกธา "คณฺหถ เทเว"ติ สมฺมุขสมฺมุขฏฺฐาเนเนว สิเนรุํ อภิรุหนฺติ, เทวาปิ นิกฺขมนฺติ. เตสํ โคปาลกทารกานํ อญฺญมญฺญํ ทณฺฑเกหิ ปหรณสทิสํ ยุทฺธํ โหติ. สกฺโก เทวราชา เหฏฺฐา ปญฺจสุ ฐาเนสุ อารกฺขํ ฐเปตฺวา อุปริ เทวปุรํ ปริวาเรตฺวา อตฺตสทิสา วชิรหตฺถา ปฏิมา ฐปาเปสิ. อสุรา เหฏฺฐา ปญฺจ ฐานานิ ปฏิพาหิตฺวา อภิรุหนฺตา ๕- อินฺทปฏิมาโย ทิสฺวา นิวตฺติตฺวา อสุรปุรเมว คจฺฉนฺติ.

ทกฺขิเณน มุขาติ ๖- ทกฺขิณมุขา หุตฺวา. อปทํ พนฺธิตฺวาติ ๗- นิปฺปทํ นิรวเสสํ พนฺธิตฺวา. อทสฺสนํ คโตติ มาโรปิ วฏฺฏปาทกํ กตฺวา รูปาวจรจตุตฺถชฺฌานํ สมาปนฺนสฺส จิตฺตํ ชานาติ, ตเทว วิปสฺสนาปาทกํ กตฺวา สมาปนฺนสฺส จิตฺตํ ชานาติ. อรูปาวจรสมาปตฺติ ปน วฏฺฏปาทา วา โหติ ๘- วิปสฺสนาปาทา วา, ตํสมาปนฺนสฺส มาโร จิตฺตํ น ชานาติ. เตน วุตฺตํ "อทสฺสนํ คโต ปาปิมโต"ติ.