กรรมสูตร

Satta vo bhikkhave aparihāniye dhamme desessāmi .pe. Katame ca bhikkhave satta aparihāniyā dhammā yāvakīvañca bhikkhave bhikkhū na kammārāmā bhavissanti [1]- na kammārāmataṃ anuyuttā vuḍḍhiyeva bhikkhave bhikkhūnaṃ pāṭikaṅkhā no parihāni. Yāvakīvañca bhikkhave bhikkhū na bhassārāmā bhavissanti .pe. na niddārāmā bhavissanti na saṅgaṇikārāmā bhavissanti na pāpicchā bhavissanti na pāpikānaṃ icchānaṃ vasaṃ gatā na pāpamittā bhavissanti na pāpasahāyā na pāpasampavaṅkā na oramattakena visesādhigamena antarā vosānaṃ āpajjissanti vuḍḍhiyeva bhikkhave bhikkhūnaṃ pāṭikaṅkhā no parihāni . Yāvakīvañca bhikkhave ime satta aparihāniyā dhammā bhikkhūsu ṭhassanti imesu ca sattasu aparihāniyesu dhammesu bhikkhū sandississanti vuḍḍhiyeva bhikkhave bhikkhūnaṃ pāṭikaṅkhā no parihānīti.