๓. วินัยวรรค

๘. วินยวคฺค

๑. ปฐมวินยธรสุตฺตวณฺณนา

อฏฺฐมสฺส ปฐเม อาปตฺตึ ชานาตีติ อาปตฺตึเยว อาปตฺตีติ ชานาติ. เสสปเทสุปิ เอเสว นโย.

๒. ทุติยวินยธรสุตฺตวณฺณนา

ทุติเย สฺวาคตานีติ สุอาคตานิ สุปฺปคุณานิ. สุวิภตฺตานีติ โกฏฺฐาสโต สุฏฺฐุ วิภตฺตานิ. สุปฺปวตฺตีนีติ อาวชฺชิตาวชฺชิตฏฺฐาเน สุฏฺฐุ ปวตฺตานิ ทฬฺหํ ปคุณานิ. สุวินิจฺฉิตานีติ สุฏฺฐุ วินิจฺฉิตานิ. สุตฺตโสติ วิภงฺคโต. อนุพฺยญฺชนโสติ ขนฺธกปริวารโต.

@เชิงอรรถ: ๑ สี. ลหุสํ, ฏีกายํ จ

๓. ตติยวินยธรสุตฺตวณฺณนา

ตติเย วินเย โข ปน ฐิโต โหตีติ วินยลกฺขเณ ปติฏฺฐิโต โหติ. อสํหีโรติ น สกฺกา โหติ คหิตคฺคหณํ วิสฺสชฺชาเปตุํ.

๙. สตฺถุสาสนสุตฺตวณฺณนา

นวเม เอโกติ อทุติโย. วูปกฏฺโฐติ กาเยน คณโต, จิตฺเตน กิเลเสหิ วูปกฏฺโฐ ทูรีภูโต. อปฺปมตฺโตติ สติอวิปฺปวาเส ฐิโต. ปหิตตฺโตติ เปสิตตฺโต. นิพฺพิทายาติ วฏฺเฏ อุกฺกณฺฐนตฺถาย. วิราคายาติ ราคาทีนํ วิรชฺชนตฺถาย. นิโรธายาติ อปฺปวตฺติกรณตฺถาย. วูปสมายาติ กิเลสวูปสมาย อปฺปวตฺติยา. อภิญฺญายาติ ติลกฺขณํ อาโรเปตฺวา อภิชานนตฺถาย. สมฺโพธายาติ มคฺคสงฺขาตสฺส สมฺโพธสฺส อตฺถาย. นิพฺพานายาติ นิพฺพานสฺส สจฺฉิกรณตฺถาย.

๑๐. อธิกรณสมถสุตฺตวณฺณนา

ทสเม อธิกรณานิ สเมนฺติ วูปสเมนฺตีติ อธิกรณสมถา. อุปฺปนฺนุปฺปนฺนานนฺติ อุปฺปนฺนานํ อุปฺปนฺนานํ. อธิกรณานนฺติ วิวาทาธิกรณํ อนุวาทาธิกรณํ อาปตฺตาธิกรณํ กิจฺจาธิกรณนฺติ อิเมสํ จตุนฺนํ. สมถาย วูปสมายาติ สมถตฺถญฺเจว วูปสมนตฺถญฺจ. สมฺมุขาวินโย ทาตพฺโพ ฯเปฯ ติณวิตฺถารโกติ อิเม สตฺต สมถา ทาตพฺพา. เตสํ วินิจฺฉโย วินยวณฺณนาโต ๑- คเหตพฺโพ. อปิจ ทีฆนิกาเย สงฺคีติสุตฺตวณฺณนายํปิ ๒- วิตฺถาริโตเยว, ตถา มชฺฌิมนิกาเย สามคามสุตฺต- วณฺณนายาติ.

วินยวคฺโค อฏฺฐโม.

@เชิงอรรถ: ๑ ฉ.ม. วินิจฺฉโย วินยสํวณฺณนโต ๒ สุ.วิ. ๓/๓๓๑/๒๓๙,๒๔๐-๒