เมตตสูตร

TIPITAKA Volume 23 : PALI ROMAN Sutta Pitaka Vol 15 : Sutta. Aṅ. (4): sattaka-aṭṭhaka-navakanipātā Suttantapiṭake aṅguttaranikāyassa aṭṭhakanipāto ---------- namo tassa bhagavato arahato sammāsambuddhassa. Paṇṇāsako mettāvaggo paṭhamo

[91] 1 Evamme sutaṃ . ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi bhikkhavoti . bhadanteti te bhikkhū bhagavato paccassosuṃ . Bhagavā etadavoca mettāya bhikkhave cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya aṭṭhānisaṃsā pāṭikaṅkhā katame aṭṭha sukhaṃ supati sukhaṃ paṭibujjhati na pāpakaṃ supinaṃ passati manussānaṃ piyo hoti amanussānaṃ piyo hoti devatā rakkhanti nāssa aggi vā visaṃ vā satthaṃ vā kamati uttariṃ appaṭivijjhanto brahmalokūpago hoti. Mettāya bhikkhave cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime aṭṭhānisaṃsā pāṭikaṅkhāti. Yo ca mettaṃ bhāvayati appamāṇaṃ paṭissato tanū saṃyojanā honti passato upadhikkhayaṃ ekampi ce pāṇamaduṭṭhacitto mettāyati kusalaṃ 1- tena hoti sabbeva pāṇe manasānukampi pahūtamariyo ca 2- karoti puññaṃ ye sattasaṇḍaṃ paṭhaviṃ jinitvā rājissayo yajamānānucariyagā sassamedhaṃ purisamedhaṃ sammāpāsaṃ vājapeyyaṃ niraggaḷaṃ mettassa cittassa subhāvitassa kalampi te nānubhavanti soḷasiṃ candappabhā tāragaṇāva sabbe (3)- yo na hanati na ghāteti na jināti na jāpaye mettaso sabbabhūtānaṃ verantassa na kenacīti.