เอเกน โภเค ภุญฺเชยฺย ทฺวีหิ กมฺมํ ปโยชเย
จตุตฺถญฺจ นิธาเปยฺย อาปทาสุ ภวิสฺสตี"ติ ๔- เอวํ ปฏิปชฺชโต ปน วโย อายํ ปริยาทาตุํ น สกฺโกติเยว.
อุทุมฺพรขาทิกนฺติ ๕- ยถา อุทุมฺพรานิ ขาทิตุกาเมน ปกฺเก อุทุมฺพรรุกฺเข จาลิเต เอกปฺปหาเรเนว พหูนิ ผลานิ ปตนฺติ, โส ขาทิตพฺพยุตฺตกานิ ขาทิตฺวา อิตรานิ พหุตรานิ ปหาย คจฺฉติ, เอวเมว โย อายโต วยํ พหุตรํ กตฺวา วิปฺปกิรนฺโต โภเค ปริภุญฺชติ, โส "อุทุมฺพรขาทิกญฺจายํ ๖- กุลปุตฺโต โภเค ขาทตี"ติ วุจฺจติ. อทฺธมาริกนฺติ อนาถมรณํ. ๗- สมชีวิกํ ๘- กปฺเปตีติ สมํ ๙- ชีวิกํ กปฺเปติ. สมชีวิตาติ สมชีวิตาย ชีวิตา. ๑๐- อปายมุขานีติ วินาสฏฺฐานานิ.
อุฏฺฐาตา กมฺมเธยฺเยสูติ กมฺมกรณฏฺฐาเนสุ อุฏฺฐานวิริยสมฺปนฺโน. วิธานวาติ วิธานสมฺปนฺโน. ๑๑- โสตฺถานํ สมฺปรายิกนฺติ โสตฺถิภูตํ สมฺปรายิกํ. สจฺจนาเมนาติ พุทฺธตฺตาเยว พุทฺโธติ เอวํ อวิตถนาเมน. จาโค ปุญฺญํ ปวฑฺฒตีติ จาโค เจว เสสปุญฺญญฺจ ปวฑฺฒติ. อิมสฺมึ สุตฺเต สทฺธาทโย มิสฺสกา กถิตา. ปญฺจมํ อุตฺตานเมว.