๔. นนฺทกสุตฺตวณฺณนา

[๔] จตุตฺเถ อุปฏฺฐานสาลายนฺติ โภชนสาลายํ. เยนุปฏฺฐานสาลาติ สตฺถา นนฺทกตฺเถเรน มธุรสฺสเรน อารทฺธาย ธมฺมเทสนาย สทฺทํ สุตฺวา "อานนฺท โก เอโส อุปฏฺฐานสาลายํ มธุรวจเนน ธมฺมํ เทเสตี"ติ ปุจฺฉิตฺวา "ธมฺมกถิก- นนฺทกตฺเถรสฺส อชฺช ภนฺเต วาโร"ติ สุตฺวา "อติมธุรํ กตฺวา อานนฺท เอโส ภิกฺขุ ธมฺมํ กเถติ, มยํปิ คนฺตฺวา สุณิสฺสามา"ติ วตฺวา เยนุปฏฺฐานสาลา เตนุปสงฺกมิ. พหิทฺวารโกฏฺฐเก อฏฺฐาสีติ ฉพฺพณฺณสฺมิโย จีวรคพฺเภ ปฏิจฺฉาเทตฺวา อญฺญาตกเวเสน อฏฺฐาสิ. กถาปริโยสานํ อาคมยมาโนติ "อิทมโวจา"ติ อิทํ กถาวสานํ อุทิกฺขมาโน ธมฺมกถํ สุณนฺโต อฏฺฐาสิเยว. อถายสฺมา อานนฺโท นิกฺขนฺเต ปฐเม ยาเม สตฺถุ สญฺญํ อทาสิ "ปฐโม ภนฺเต ยาโม อติกฺกนฺโต โถกํ วิสฺสมถา"ติ. สตฺถา ตตฺเถว อฏฺฐาสิ. อถายสฺมา อานนฺโท มชฺฌิมยาเม นิกฺขนฺเต "ภนฺเต ตุเมฺห ปกติยา ขตฺติยสุขุมาลา, ปุน พุทฺธสุขุมาลา ๑- ปรมสุขุมาลา, มชฺฌิมยาโมปิ อติกฺกนฺโต, มุหุตฺตํ วิสฺสมถา"ติ อาห. สตฺถา ตตฺเถว อฏฺฐาสิ. ตสฺส ฐิตกสฺเสว อรุณุคฺคมนํ ๒- ปญฺญายิตฺถ. อรุณุคฺคมนญฺจ เถรสฺส อิทมโวจา"ติ ปาเปตฺวา กถาปริโยสานญฺจ ทสพลสฺส ฉพฺพณฺณรสฺมิวิสฺสชฺชนญฺจ ๓- เอกปฺปหาเรเนว อโหสิ. อคฺคฬํ อาโกเฏสีติ อคฺคนเขน ทฺวารกวาฏํ อาโกเฏสิ.

@๓ ฉ.ม. ฉพฺพณฺณสรีรรสฺมิวิสฺสชฺชนญฺจ